Կենսաբանական գիտությունների դոկտոր, պրոֆեսոր, ՀՀ Մոլեկուլային կենսաբանության ակադեմիական ինստիտուտի էթնոգենոմիկայի լաբորատորիայի վարիչ Լևոն Եպիսկոպոսյանը ոչ ֆորմալ կրթության ծրագրի շրջանակներում արդեն երկրորդ անգամ ԱրՊՀ-ում ներկայացնում է իր գիտահետազոտական աշխատանքի արդյունքները:
Հանդիպմանը ներկա էին ԱրՊՀ ռեկտոր Մանուշ Մինասյանը, պրոռեկտորներ, բնագիտական ֆակուլտետի ղեկավար կազմը, դասախոսներ, ուսանողներ:
Զբաղված լինելով հետազոտություններում, որոնք թույլ կտան պարզել հայկական էթնոսի գենետիկան, որոշել հայերի բնակեցման աշխարհագրական սահմանները, Լ. Եպիսկոպոսյանն ու մարդաբաններից, կենդանաբաններից, բուսաբաններից և երկրաբաններից կազմված արշավախումբը ԱՀ Կառավարության հրավերով և առաջարկությամբ 2011, 2014 և 2016 թվականներին պեղման աշխատանքներ է իրականացրել Արցախի քարանձավներում:
«Խորհրդային շրջանում Ադրբեջանի վարած քաղաքականության հետևանքով հայկականության հետ առնչվող հետազոտությունները արգելված էին ոչ միայն հայ, այլև օտարազգի հետազոտողների շրջանում: Այսօր մենք հնարավորություն ունենք ոչ միայն պեղումներ իրականացնելու տարածաշրջանում բացառիկ նշանակություն ունեցող քարանձավներում, այլև դրանց արդյունքները հասանելի դարձնել միջազգային հանրությանը»,- ասել է Լ. Եպիսկոպոսյանը:
Այս հարցում հետազոտողներին օգնել են մասնագետներ Լեհաստանից, մասնավորապես՝ մարդաբանության ամբիոնի վարիչներ Կրակովից և Պոտսդամից: «Քարին տակի քարանձավում ԴՆԹ-ի պահպանման մակարդակը շատ բարձր է»,- նշել է Լ. Եպիսկոպոսյանը:
Քարին տակի քարանձավում հայտնաբերվել է 8000 տեսակի կենդանական բրածո մնացորդ, ոսկրային նյութի հիման վրա գյուղում ստեղծված ժամանակավոր լաբորատորիայում որոշվում է հնագիտական շերտերի տարիքը: Մշակութային հարուստ նյութ պարունակելուց բացի, Քարին տակի քարանձավը, ի տարբերություն Ազոխի քարանձավի, պահպանել է հնագույն ժամանակների ԴՆԹ, ինչի շնորհիվ արշավախմբին հետաքրքրող ավելի շատ հարցեր գտնում են պատասխաններ:
Լ. Եպիսկոպոսյանը մտահոգություն է հայտնում, որ օտարազգի ուսանողները և երիտասարդ հետազոտողներն ավելի շատ են ներգրավվում աշխատանքային տարբեր խմբերում, քան տեղի ուսանողությունը:
«Մենք պետք է աշխարհին ցույց տանք, որ Արցախը ոչ միայն պատերազմում կամ պաշտպանվում է, այլև՝ ուզում է օգտվել կյանքի հաճույքներից, որը նաև գիտությունն ու մշակույթն է: Ուստի առաջարկում եմ և հորդորում պոտենցիալ ունեցող ուսանողներին` ներգրավվել այս աշխատանքներում»,- նշել է արշավախմբի ղեկավարը և ուսանողներին առաջարկել մասնակցել 2017 թվականի աշխատանքներին:
Ռեկտոր Մ. Մինասյանը շնորհակալություն է հայտնել Լ. Եպիսկոպոսյանին գիտական նորություններով համալսարանականների հետ կիսվելու և պարբերական շփումների համար, ապա պայմանավորվածություն է ձեռք բերվել առաջիկա պեղումներին ԱրՊՀ ուսանողությանը ևս ներգրավելու առումով: