ԱրՊՀ-ում կազմակերպվող միջոցառումներին վերաբերող հարցերի շուրջ օրերս զրուցել ենք ԱրՊՀ ուսանողների, շրջանավարտների և հասարակայնության հետ տարվող աշխատանքների գծով պրոռեկտոր, հոգեբ. գիտ. թեկնածու, դոցենտ Վիտյա Յարամիշյանի հետ։
Նրա խոսքով՝ ԱրՊՀ-ում կազմակերպվող միջոցառումների նպատակն այն է , որ ինչ չի ուսուցանվում դասապրոցեսում, ուսանողը ձեռք բերի կազմակերպվող միջոցառումների, շփումների ժամանակ։ ԱրՊՀ-ում կազմակերպվում են տարաբնույթ միջոցառումներ, որոնց ուսանողները մասնակցում են սիրով և մեծ ընդգրկվածությամբ:
«Համալսարանում և համալսարանից դուրս մեր ուսանողների մասնակցությամբ կազմակերպում ենք տարաբնույթ միջոցառումներ, որոնցից է՝ եռատոնի նախօրեին Վերածննդի հրապարակում տեղի ունեցած մեր ուսանողների պարային ֆլեշ-մոբը։ Դրանից բացի, այդ օրերին միջոցառումների մի երկար շղթա ենք նախապատրաստել և ներկայացրել հասարակությանը: Առանձնահատուկ էր Շուշիի ազատագրման և պաշտպանության բանակի կազմավորման օրվա առթիվ ՊԲ հրամանատարի այցը համալսարան և նրա վարած արիության դասը, ինչպես նաև կրթության, գիտության և սպորտի նախարարի վարած դասը»- մանրամասնել է Վ. Յարամիշյանը։
Վ. Յարամիշյանը բարձր է գնահատում ուսանողների մասնակցությունն ու ակտիվությունը համալսարանական կյանքում։ «Իմ կարծիքով, եթե տոնը ընկալվում է ուսանողների կողմից որպես իրենց կյանքի նշանակալի իրադարձություն, ապա սիրով մասնակցում են միջոցառումներին։ Ցանկալի կլիներ, որ յուրաքանչյուր ուսանող համալսարանում իրեն զգա լիարժեք անդամ և մասնակցի նրա ներքին գործընթացների կառավարմանը»,-ասաց նա։
Համալսարանում ուսանողներն ունեն իրենց ինքնավար կառույցները՝ ուսանողական խորհուրդ, գիտական ընկերություն, ինչպես նաև ներգրավված են համալսարանական խորհրդի և գիտխորհրդի կազմում։Պրոռեկտորի կարծիքով՝ յուրաքանչյուր ուսանող համալսարանում պետք է ինքնադրսևորման հարթակ գտնի իր համար, որովհետև բոլորի նախասիրությունները նույնը չեն. ոմանք ձգտում են գիտական գործունեության մեջ իրենց դրսևորել, ոմանք` մշակութային, ժամանցային կամ սպորտային միջոցառումներին մասնակցել։ Նրա խոսքով, բոլոր ֆակուլտետների ուսանողներն ակտիվ մասնակցում են ուսանողական կյանքին:
«Եթե մի ուսանող երկու անգամ է մասնակցել մի միջոցառմանը և տվյալ պահին ակտիվ է եղել, ապա դա չի նշանակում, որ մյուսը նրան զիջում է իր դիրքորոշումներով ու մտահղացումներով։ Բոլորն էլ իրենց ակտիվորեն են դրսևորում, նայած ինչ կարգի միջոցառում է կազմակերպվում։ Օրինակ, տնտեսագիտության ֆակուլտետի ուսանողները մեծ սիրով մասնակցում են հանրային միջոցառումներին, որոնք ենթադրում են արտահամալսարանական ակտիվություն, իսկ բանասիրական ֆալուլտետի, մանկավարժության և սպորտի ֆակուլտետի ուսանողները մեծ խանդավառությամբ մասնակցում են մշակութային միջոցառումներին: Բնագիտական ֆակուլտետում կան ուսանողներ, ովքեր ներգրավված են հանրօգուտ աշխատանքներում։ Նաև բնագիտական և տնտեսագիտական ֆալուլտետների ուսանողների մասնակցությամբ իրականացնում ենք ռազմական դասընթացներ։
Կարծում եմ, որ եթե մեզ հաջողվի ուսանողների կազմակերպվածության աստիճանն ավելի բարձրացնել, ապա մեր համալսարանն իսկապես լիարժեք կկատարի իր առջև դրված խնդիրը` այն է՝ թողարկել տնտեսության համար լիարժեք պատրաստված մասնագետներ»,-ավելացրել է նա։
Վ. Յարամիշյանը վերջում ավելացրեց, որ շատ բան հենց ուսանողից է կախված, իսկ համալսարանի ղեկավարությունը նախևառաջ փորձում է լիարժեք ուսումնասիրել ուսանողի տեսակետներն ու կարծիքները։
Զրույցը վարեց Աննա Պետրոսյանը, լրագրություն 1-ին կուրս
Լուսանկարները՝ Անի Ավանեսյանի, լրագրություն 3-րդ կուրս