ԱրՊՀ տնտեսագիտության ֆակուլտետը մշտապես ուշադրության կենտրոնում է պահում բուհ-դպրոց համագործակցությունը, որի շրջանակում օրերս Ստեփանակերտի Վ.Ջահանգիրյանի անվան հ. 11 ավագ դպրոցում ուսանողները կազմակերպեցին դասընթացներ:
Ֆինանսահաշվային ամբիոնի վարիչ, տ.գ.թ., դոցենտ Նարինե Ավանեսյանի նախաձեռնությամբ կազմակերպված դասընթացների շրջանակներում ուսանողները աշակերտների համար հանդես են եկել բանկային համակարգի, ավանդների ու վարկերի վերաբերյալ բանախոսություններով:
«Մեր նպատակը ավագ դասարանների աշակերտների շրջանում ֆինանսական գրագիտության մակարդակի բարձրացումն էր: Մենք փորձում էինք հնարավորինս մատչելի բացատրել աշակերտներին նյութը, աշակերտներն էլ իրենց հերթին հետաքրքրող բազմաթիվ հարցեր հնչեցրին, որոնց տրվեցին պատասխաններ մեր ուսանողների կողմից»,- ասում է ուսանողուհի Անահիտ Շահրամանյանը:
Հավելենք, որ դասախոսություններով հանդես եկած ուսանողները դպրոցի տնօրենության կողմից արժանացել են շնորհակալագրերի: