Հայաստանյան մեդիադաշտի մի խումբ ներկայացուցիչներ ապրիլի 16-ին ԱրՊՀ-ում հանդիպում-քննարկումներ են ունեցել լրագրության բաժնի դասախոսական կազմի և ուսանողության հետ:
Հեռուստատեսության և ռադիոյի ազգային հանձնաժողովի նախագահ Գագիկ Բունիաթյանի գլխավորությամբ մայր բուհ ժամանած մեդիագործիչներին ողջունել և ներկայացրել է ԱրՊՀ ռեկտոր Մանուշ Մինասյանը: Նա շնորհակալություն է հայտնել այցելության համար և հետագա համագործակցության հույս հայտնել. «Հուսով եմ, որ այսօրվա հանդիպումը նոր հանդիպումների սկիզբ կհանդիսանա, իսկ ոլորտին առնչվող քննարկումները՝ նոր նախաձեռնությունների խթան»:
Գ. Բունիաթյանն ու նրա գործընկերները անդրադարձել են ՀՀ և ԱՀ լրատվամիջոցների համագործակցության հեռանկարներին՝ առկա մարտահրավերների համատեքստում: Հայաստանյան տարբեր հեռուստաընկերություններ ներկայացնող բանախոսները առանձին-առանձին շեշտեցին լրագրության դերն ու նշանակությունը հատկապես տեղեկատվական տեխնոլոգիաների ներկայիս դարաշրջանում՝ կոչ անելով ուսանողներին ուղենիշ դարձնել լրագրողական գործունեության հիմնարար սկզբունքները՝ անաչառությունն ու օբյեկտիվությունը:
«Եթե ձեր աշխատանքային գործունեության մեջ առաջնորդվեք անաչառությամբ և օբյեկտիվությամբ, կնշանակի իրագործել եք լրագրության հիմնական գործառույթները և հաջողել եք ձեր գործում»,- նկատում է Հայաստանի հանրային հեռուստաընկերության գործադիր տնօրեն Մարգարիտ Գրիգորյանը:
Վկայակոչելով աշխարհաքաղաքական վերջին իրադարձությունները՝ Գ. Բունիաթյանը անդրադարձավ հիբրիդային պատերազմի էական բաղադրիչներից ինֆորմացիոն պատերազմներին, ապա և Արցախի կարգավիճակի համատեքստում քննարկեց լրագրության դերակատարությունը:
Հյուրերը պատասխանել են նաև ներկաների հարցերին, քննարկել հետագա համագործակցության հարցեր: Այցի շրջանակում համալսարանի բանասիրական ֆակուլտետի լրագրության բաժնին նվիրել են նաև պրոյեկտոր: