Մայիսի 11-ին ԱրՊՀ մի խումբ դասախոսների և ուսանողների հետ հանդիպում է ունեցել վերլուծաբան, դիվանագետ, միջազգայնագետ Դարիլ Քոփլենդը:
ԱրՊՀ պրոռեկտոր Վալերի Ավանեսյանը ներկայացրել է արդեն երկրորդ անգամ Արցախում գտնվող դիվանագետին, մանրամասնել նրա աշխատանքային գործունեության որոշ դրվագներ:
Քոփլենդն իր ելույթը կառուցեց ի՞նչ է դիվանագիտությունը և ինչու՞ է այն կարևոր, ապա անցում կատարեց հայկական դիվանագիտության ձեռքբերումներին` շեշտելով երկխոսելու արվեստն ու փոխզիջումների մեխանիզմները:
Խոսելով կարճաժամկետ և երկարաժամկետ սպառնալիքների մասին`վերլուծաբանն առանձնացնում է հայկական կողմի մրցունակ առավելությունը` միասնականությունը:
«Տևական ժամանակ պատասխանատու գործառույթներ եմ իրականացրել Կանադայի արտաքին գործերի նախարարությունում, հայկական հարցով զբաղվել եմ թե΄ ի պաշտոնե, թե΄ իբրև անհատ: Իմ ուսումնասիրությունները հանգեցրել են այն բանին, որ հայկական կողմի մրցունակ առավելությունը միասնականությունն է, որ իր դրսևորումն է գտնում բոլոր ոլորտներում»,- նկատում է Դ. Քոփլենդը:
Հանդիպման երկրորդ մասում բանախոսը պատասխանել է ներկաների հարցերին: