Անցած շաբաթ Արցախի պետական համալսարանը հյուրընկալեց Հայաստանի հայ-ռուսական (սլավոնական) համալսարանի ուսանողական ու դասախոսական պատվիրակություններին: Հայաստանի և այլ երկրների բուհերի հետ համագործակցությունը ԱրՊՀ զարգացման ծրագրի կարևոր դրույթներից է:
Հայ-ռուսական (սլավոնական) համալսարանը տարիքի առումով թեպետ մեծ չէ (հիմնադրվել է 1997թ.), սակայն արդեն մեծ համբավ ունի: Դասախոսական կազմի հետ հանդիպման ժամանակ, որում ընդգրկված էին ակադեմիկոսներ ու պրոֆեսորներ, ԱրՊՀ ռեկտոր Ստեփան Դադայանը կարևորել է Հայաստանի սլավոնական համալսարանի հետ գործնական կապեր ստեղծելը` շեշտելով, որ միջազգային չափանիշներին համապատասխանելու առումով հիշյալ համալսարանը գտնվում է վարկանիշային բուհերի ցուցակում: Արցախի պետական համալսարանը բարձրորակ մասնագետների կարիք շատ է զգում, ասել է ԱրՊՀ ռեկտորը: Ըստ Ս. Դադայանի` մասնագետների կարիք կա էլեկտրաէներգետիկայի, հեռահաղորդակցության, տնտեսագիտության, քաղաքագիտության և այլ մասնագիտությունների գծով:
Հայ-ռուսական (սլավոնական) համալսարանի պատվիրակության ղեկավար, ռեկտորի տեղակալ, ակադեմիկոս Էդուարդ Ղազարյանը վստահեցրել է, որ իրենց բուհի ղեկավարությունը շահագրգռված է Արցախի պետհամալսարանի հետ տարբեր ուղղություններով կապերի խորացմամբ, այդ թվում նաև` գիտական ոլորտում համագործակցությամբ: Իսկ այդ պատրաստակամությունը պաշտոնական այց կատարելու մտահղացման է վերածվել ԼՂՀ Նախագահ Բակո Սահակյանիª հայ-ռուսական (սլավոնական) համալսարան վերջերս կատարած այցից հետո, որի ժամանակ նրան շնորհվել է պատվավոր դոկտորի կոչում: Ակադեմիկոսի խոսքով` շատ պատվիրակություններ են Արցախ այցելել, սակայն դրանք կրել են էպիզոդիկ բնույթ, ունեցել ավելի շատ Արցախին ծանոթանալու նպատակ: Ցավալիորեն, այդ այցերը շարունակակություն չեն ունեցել, ինչը կբերեր շոշափելի արդյունքների, գոնե, իրեն հայտնի գիտակրթական ոլորտում: Ակադեմիկոսի հավաստմամբ, իրենք այդպես չեն տրամադրված. բուհի ռեկտորից խիստ հանձնարարական ունեն լինել բոլոր ֆակուլտետներում, ամբիոններում, լսել մասնագետներին, առաջարկությունները համախմբել ու ներկայացնել իրենց համալսարանի գիտխորհրդի հաստատմանը: Առանձնապես շատ օգտակար կարող է լինել համագործակցությունն ինժեներական ֆակուլտետի հետ, քանզի Հայաստանում միակ ֆիզիկատեխնիկական ֆակուլտետը ներկայացնում է Հայ-ռուսական (սլավոնական) համալսարանը, որտեղ աշխատում են բարձր որակավորում ունեցող ինժեներ-ֆիզիկոսներ էլեկտրոնիկայի, նանոէլեկտրոնիկայի և հեռահաղորդակցության գծով: Վերջինիս գծով համալսարանի բազայի վրա Երևանում բացվել է նաև կապի ինստիտուտ: Առաջին պաշտոնական հանդիպումը նպատակ ունի մի քանի ուղղությունների գծով տեսանելի ծրագրեր կազմել և ձեռնամուխ լինել դրանց իրականացմանը: Ճիշտ է, Արցախին ամեն տարի նպատակային տեղեր են հատկացվում Հայ-ռուսական (սլավոնական) համալսարանում, սակայն, ցավոք, դրանք համալրվում են հիմնականում հումանիտար մասնագիտությունների գծով: Եվ եթե ԱրՊՀ¬ի հետ ծավալվի ակտիվ համագործակցություն, ապա մոտ ապագայում կարձանագրվեն որոշակի ձեռքբերումներ, համոզված է Էդուարդ Ղազարյանը: Խոսքը վերաբերում է և’ կադրերի պատրաստմանը, և’ կրթական ծրագրերին:
Իրենց ծրագրերը հյուրերը ներկայացրել են նաև վարչապետ Արա Հարությունյանի ու ԼՂՀ կրթության և գիտության նախարար Վլադիկ Խաչատրյանի հետ ունեցած հանդիպումների ժամանակ:
Հայ-ռուսական /սլավոնական/ համալսարանի պաշտոնական ներկայացուցիչները համապատասխան թեմաներով դասախոսություններ են կարդացել ԱրՊՀ ուսանողների համար: Իսկ ավագ դպրոցի ֆիզիկայի և մաթեմատիկայի ուսուցիչների հետ հանդիպում են ունեցել այդ դասարանների դասագրքերը կազմողներ` ակադեմիկոս Էդուարդ Ղազարյանն ու ֆիզմաթ գիտությունների դոկտոր, պրոֆեսոր, Բարձր տեխնոլոգիաների կենտրոնի տնօրեն Հարություն Գասպարյանը: