ԱրՊՀ քիմիայի ամբիոնի դեղագործական քիմիա մասնագիտության պարապմունքները տեսականից բացի, իրականացվում են նաև դաշտային պայմաններում՝ փորձուսուցման ընթացքում լրացնելով ուսանողների գործնական հմտություններն ու կարողությունները:
Քիմիայի ամբիոնի դասախոս Արդիանա Ղուլյանի խոսքով՝ Արցախում աճող դեղաբույսերին ծանոթանալու և դեղաբուսական հումք հավաքելու նպատակով հաճախ են կազմակերպվում ուսումնաճանաչողական էքսկուրսիաներ դեպի Արցախի բարձրադիր գոտիներ, որոնք աչքի են ընկնում էկոլոգիապես մաքուր դեղաբույսերով հարուստ վայրերով:
Հերթական ուսումնաճանաչողական այցի հասցեն Կաշենի հանքավայրն էր: Փորձուսուցման շրջանակում, Արդիանա Ղուլյանի ղեկավարությամբ, դեղագործական քիմիա մասնագիտության 4-րդ կուրսի ուսանողներն այցելել են Կաշենի հանքավայր: Այցի ընթացքում ուսանողները ծանոթացել են հանքավայրի գործունեությանը, ժամանակակից սարքավորումներով հագեցած լաբորատորիաներին, համապատասխան ստորաբաժանումների ղեկավարները տեղեկություններ են ներկայացրել ուսանողներին հանքավայրի, հանքանյութի, մշակման աշխատանքների, սարքավորումների մասին:
Այցն ավարտվել է հյուրասիրությամբ. ուսանողները նաև խորհրդանշական նվերներ են ստացել ‹‹Բեյզ Մեթըլզ›› ընկերության կողմից:
«Անչափ տպավորված ենք: Օրը հագեցած էր, մենք հնարավորություն ունեցանք հաճելին և արդյունավետը համատեղելու՝ ձեռք բերելով նոր գիտելիքներ, տեսականը ամրապնդելով գործնականով: Նման ուսումնաճանաչողական այցերը շատ կարևոր են մեզ՝ ուսանողներիս համար: Շնորհակալ ենք ‹‹Բեյզ Մեթըլզ›› ընկերությանը՝ ընձեռած հնարավորության համար»,-իր տպավորություններն է կիսում դեղագործական քիմիա 4-րդ կուրսի ուսանողուհի Անգելինա Բաղդասարյանը: