Հոկտեմբերի 12-ը Հայաստանում նշում են որպես ծխելու դեմ պայքարի ազգային օր, որի կապակցությամբ ԱրՊՀ մանկավարժության և սպորտի ֆակուլտետի ուսանողական խորհուրդը նախաձեռնել էր ծխելու դեմ պայքարի յուրահատուկ ակցիա:
Ակցիայի շրջանակներում ուսանողները ծխախոտի դեմ պայքարը քարոզող պաստառներ են պատրաստել, ապա քաղցրեղենով լիքը տուփ տեղադրել՝ առաջարկելով տուփի պարունակությունը փոխարինել ծխախոտով:
Ֆակուլտետի ՈւԽ նախագահ Ռիմմա Մանգասարյանը, խոսելով նախաձեռնության մասին, նկատում է, որ ծխախոտի դեմ պայքարի ազգային օրն առիթ է, որպեսզի հերթական անգամ անդրադառնանք ծխախոտի անդառնալի հետևանքներին:
«Բավականին մեծ ոգևորություն էր տիրում և΄ դասախոսների, և΄ ուսանողության շրջանում: Քանի որ մեր ֆակուլտետի արական սեռի ներկայացուցիչները մեծամասամբ մարզիկներ են և չեն ծխում, տուփի պարունակությունը փոխարինեցին այլ ֆակուլտետի ծխող ուսանողների ծխախոտներով»,- ասել է Ռ. Մանգասարյանը:
Ֆակուլտետի ղեկավար կազմը ևս մեծ ոգևորությամբ է մասնակցել ակցիային՝ միաժամանակ քաջալերելով նախաձեռնության հեղինակներին, հորդորել պարբերաբար քարոզչական աշխատանքներ իրականացնել ուսանողության շրջանում: