Դեկտեմբերի 6-ին ԱրՊՀ տնտեսագիտության ֆակուլտետը «Ներդրումների ճյուղային կառուցվածքի էկոնոմետրիկ վերլուծությունը» թեմայով նախաձեռնել էր գիտական ընթերցումներ՝ զուգահեռաբար ծավալելով քննարկումներ ոլորտի պատասխանատուների հետ:
Քննարկմանը հրավիրված էին ԱՀ պետնախարար Գրիգորի Մարտիրոսյանը, ֆինանսների նախարար Արթուր Հարությունյանը, գյուղատնտեսության փոխնախարար Վիլեն Ավետիսյանը, Ազգային վիճակագրական ծառայության պետ Մանուշ Մինասյանը, «Գյուղի և գյուղատնտեսության աջակցության» հիմնադրամի գործադիր տնօրենի տեղակալ Մհեր Ասրյանը, ԱրՊՀ ղեկավար կազմը, ներկայացուցիչներ պետնախարարի աշխատակազմից, դասախոսներ, ուսանողներ:
ԱրՊՀ ռեկտոր Արմեն Սարգսյանը ողջունել է ներկաներին և կարևորել ոլորտի ներկայացուցիչների ներգրավմամբ տնտեսագիտության ֆակուլտետի կողմից պարբերաբար արդիական քննարկումների կազմակերպումը` հույս հայտնելով, որ ուսանողները դրանցից յուրացնելու են լավագույնը:
Տնտեսագիտության ֆակուլտետի դեկան, տ.գ.թ., դոցենտ Ռուզաննա Մանգասարյանը, դառնալով ընտրված թեմայի արդիականությանը, նկատում է, որ այն տնտեսական անվտանգության կարևոր բաղադրիչներից է և վերջին շրջանում մեր հանրապետությունում ոլորտը բարեփոխումների փուլ է թևակոխել:
«Վերջին շրջանում բավականին շատ է շոշափվում տնտեսական անվտանգության խնդիրը, որի գնահատման շեմային ցուցանիշ է համարվում նաև ներդրումների մակարդակը: Այսօր ԱՀ Կառավարության տնտեսական քաղաքականության առանցքային ուղղություններից մեկը հենց ներդրումային քաղաքականության ակտիվացումն է և գործարար միջավայրի զարգացումը»,- նշել է Ռ. Մանգասարյանը:
Կառավարում մասնագիտությամբ սովորող 2-րդ կուրսի մագիստրանտների կողմից ներդրումների ճյուղային կառուցվածքի ռեգրեսիոն վերլուծության ու ԱՀ տնտեսական ցուցանիշների շրջանակում դրանց արդյունավետության գնահատման վերաբերյալ իրականացված սոցհարցումների և տնտեսության մակարդակը արտացոլող ցուցանիշների վերլուծության հիման վրա ծավալված քննարկմանն արձագանքեցին բոլոր հրավիրվածները: Վերջիններս ոչ միայն բարձր են գնահատել ուսանողների ինքնուրույն եզրակացությունները, այլև տեսակետներ հայտնել քննարկման բաղադրիչների վերաբերյալ:
Խոսելով ԱՀ Կառավարության կողմից վարվող ներդրումային քաղաքականության, դրա արդյունավետության և բարեփոխումների մասին՝ պետնախարարը նշել է, որ ներդրումային համակարգը տնտեսության այն բաղադրիչներից է, որ մշտապես բարելավման կարիք է զգում, և որևէ փուլում դրա արդյունավետությունը բավարար գնահատելը ճիշտ չէր լինի: Ինչ վերաբերում է ուսանողների ինքնուրույն աշխատանքներին՝ Գ. Մարտիրոսյանը դրանք որակել է հետաքրքիր և նպատակային. «Ուսումնասիրության արդյունքներն, ըստ էության, նորություն չեն մեզ համար, սակայն ողջունելի է մագիստրանտների մոտեցումը»:
Գ. Մարտիրոսյանը անդրադարձել է նաև քննարկվող թեմայի վերաբերյալ ԱՀ Կառավարության մոտեցումները, դրանց իրացման ուղիները:
