Այս օրերին ԱրՊՀ բանասիրական, պատմության և իրավագիտության, մանկավարժության և սպորտի, տնտեսագիտության և բնագիտական ֆակուլտետներում ուսանողական գիտական ընկերությունների նախաձեռնությամբ կազմակերպվել են «Ինչպե՞ս գրել գիտական հոդված» խորագիրը կրող սեմինար-պարապմունքներ:
Սեմինարի ընթացքում բանախոսներն ուսանողներին ներկայացրել են, թե ինչ է գիտական հոդվածը, ինչ կառուցվածքային մասերից է բաղկացած այն, ինչպես նաև հոդվածի գիտական պահանջները, այն գրելու նախապատրաստական քայլերը:
«Դասընթացի ժամանակ քննարկվել են գիտահետազոտական աշխատանքներ կատարելու սկզբունքներն ու առանձնահատկությունները, հետազոտական աշխատանքներին ներկայացվող պահանջները, այն իրագործելու փուլերը»,- ասել է մանկավարժության և սպորտի ֆակուլտետի ՈւԳԸ նախագահ Ալիսա Խաչատրյանը` հավելելով որ դիտարկվել են նաև այն թերացումները, որոնք հաճախ հանդիպում են ուսանողների կատարած գիտահետազոտական, կուրսային, ավարտական աշխատանքներում և թեզերում, ապագայում նմանօրինակ թերացումներից խուսափելու նպատակով:
Հետագա գործունեություն ծավալելու համար ուսանողներին տրվել են նաև մի շարք գործնական խորհուրդներ: