ԱրՊՀ հայագիտական կենտրոնի ու քաղաքագիտության և փիլիսոփայության ամբիոնի նախաձեռնությամբ կազմակերպվել էր Գառնիկ Դավթյանի «Հայատյացությունը Ադրբեջանի պետական գաղափարախոսության հիմքում» գրքի քննարկումը:
Հեղինակի հետ ծանոթության և գրքի քննարկում կազմակերպելու գաղափարի մասին պատմեց պատմության ամբիոնի դոցենտ, պ.գ.թ. Նելլի Բաղդասարյանը՝ միաժամանակ ողջունելով երիտասարդ հետազոտողի մտահղացումը:
Գրքի հեղինակը, ով ԵՊՀ արևելագիտության ֆակուլտետի հայցորդ է, իր մագիստրոսական թեզի հիման վրա տպագրված մենագրության մասին խոսելիս առաջին հերթին ընդգծում է այն, որ հարևան երկրում հայատյացության դրսևորումներն ինքը ուսումնասիրել և վերհանել է քրեաիրավական տեսանկյունից, որով և պայմանավորված է աշխատանքի արդիականությունը:
«Աշխատությունը նպատակ է հետապնդում հայ-ադրբեջանական հարաբերությունները վերլուծել իրավական ոլորտում՝ հնարավորություն ընձեռելով հետաքրքրվող անձանց լիարժեք պատկերացում կազմելու Ադրբեջանում քարոզվող հայատյացության մակարդակի մասին»,- մանրամասնում է հեղինակը:
Գրքի շուրջ ելույթներ և կարծիքներ են հայտնել ինչպես ներկա դասախոսներ, այնպես էլ ուսանողներ, որից հետո հեղինակը առանձին խմբաքանակով գրքեր է նվիրել հայագիտական կենտրոնին, քաղաքագիտության և փիլիսոփայության ամբիոնին:
