Այս օրերին ԱրՊՀ ռեկտոր Արմեն Սարգսյանը հանդիպումներ է ունենում բուհի ուսանողական ինքնավար մարմինների և խմբերի ավագների հետ:
Ռեկտորը նշել է, որ ուսանողության հետ անմիջական շփումների ցանկությունն ու պահանջը մեծ է, սակայն դրանց ոչ պարբերական բնույթը պայմանավորված է մի շարք օբյեկտիվ հանգամանքներով:
«Ի տարբերություն ուսանողների հետ տարվող աշխատանքների համար պատասխանատու օղակների` ղեկավարությունն այս շրջանում փոքր-ինչ պասիվ է հանդիպումների և շփումների առումով»,- ասել է Ա. Սարգսյանը:
Պատճառը, ըստ նրա, մի քանի հանգամանքի հետ է կապված, որոնցից են հավատարմագրման գործընթացն ու ուսումնական պլանների վերանայումը:
Հանդիպումների ընթացքում «Ի՞նչ է տալու մեզ հավատարմագրումը» հարցին է անդրադարձել բուհի պատասխանատուն՝ թվարկելով այն հնարավորությունները, որոնք կբացվեն բուհի և նրա շահակիցների առջև հավատարմագրման արդյունքում:
«Այսօր մենք համագործակցության ավելի քան երեք տասնյակ պայմանագրեր ունենք, այդ թվում՝ արտասահմանյան առաջատար բուհերի հետ: Սակայն դրանք չեն կարող ամբողջական գործողության մեջ դրվել միայն այն պատճառով, որ բուհը գրանցված չէ միջազգային գրանցամատյանում»,- նշել է ռեկտորը ՝ մանրամասնելով հավատարմագրման մի շարք այլ կողմեր ևս:
ԱրՊՀ ռեկտորը պատասխանել է նաև ուսանողների հնչեցրած հարցերին:
