Ոչ ֆորմալ կրթության ծրագրի շրջանակներում մայիսի 24-ին ԱրՊՀ-ում դասախոսությամբ հանդես է եկել ՀՀ Սահմանադրական դատարանի նախագահ Հրայր Թովմասյանը:
Ողջունելով ՀՀ Սահմանադրական դատարանի պատվիրակությանը` ԱրՊՀ ռեկտոր Արմեն Սարգսյանը կարևորել է ոչ ֆորմալ կրթության ծրագրի իրականացումն ու շեշտել, որ մայր բուհի հիմնադրման 50-ամյակի կապակցությամբ ծրագիրը նոր թափ է ստացել:
Նախքան բանախոսությանն անցնելը` ՀՀ Սահմանադրական դատարանի նախագահը շնորհակալություն հատնեց հյուրընկալության համար՝ նշելով, որ իրենց համար պատիվ է ոչ միայն հայրենիքի արցախյան հատվածի սահմանադրության մշակման աշխատանքներին մսանակից լինելը, այլև համալսարանականների հետ փորձով և գիտելիքներով կիսվելը:
Բանախոսությունը վերաբերում էր պետության կյանքում Սահմանադրական դատարանի դերին և նշանակությանը, հիմնական գործառույթներին:
Հ.Թովմասյանն անդրադարձավ նաև ԱրՊՀ-ի հետ հնարավոր համագործակցությանը. «Պետք է գտնել ձևաչափեր, որոնք հնարավորություն կտան ԱրՊՀ ուսանողների փորձուսուցումը կազմակերպել Սահմանադրական դատարանում: Հետամուտ ենք լինելու նաև, որպեսզի ՍԴ՝ իրավունքի տարբեր ճյուղերը ներկայացնող դատավորները պարբերաբար դասախոսություններով հանդես գան ԱրՊՀ-ում»:
Այնուհետև ՍԴ ներկայացուցիչները պատասխանել են համալսարանականների հարցերին, իրենց իրավասությունների շրջանակներում մեկնաբանել որոշ իրողություններ:
Հանդիպման ավարտին ԱրՊՀ ռեկտոր Ա.Սարգսյանը Հ.Թովմասյանին նվիրել է «Արցախի բարբառի բառարան» գիրքը, վերջինս էլ իր հերթին՝ մասնագիտական գրքեր ԱրՊՀ գրադարանին:
