Այսօր` հուլիսի 25-ին, ԱրՊՀ տնտեսագիտության ֆակուլտետում կայացել է «Ֆինանսիստի մասնագիտական պահանջները» թեմայով քննարկում, որին մասնակցում էին տնտեսագիտության ֆակուլտետի «Ֆինանսներ» մասնագիտությամբ սովորող ուսանողներ:
Քննարկումը հրավիրել է ֆինանսահաշվային ամբիոնի վարիչ, տ.գ.թ., դոցենտ Նարինե Ավանեսյանը` մասնագիտական կրթական ծրագրերի ձևավորման ընթացքում ուսանողների տեսակետներն ու առաջարկները ևս հիմք ընդունելու նպատակով:
«Ներկայումս ԱրՊՀ-ում ընթանում են խոշոր բարեփոխումներ` բուհի մասնագիտական կրթական ծրագրերով ակնկալվող վերջնարդյունքները աշխատաշուկայի պահանջներին համապատասխանեցնելու նպատակով: Սա անհրաժեշտ քայլ է կրթական ծրագիրն ավարտելուց հետո տվյալ մասնագիտությանը համապատասխան աշխատանք գտնելու հնարավորության մեծացման առումով»,-ասում է Ն. Ավանեսյանը` հավելելով, որ ուսանողները լավագույնս կարող են մեկնաբանել, թե իրենց մասնագիտությամբ անհրաժեշտ գիտելիքները, իմացությունները, հմտությունները ինչքանով են ձեռք բերվում բուհում և ինչ նոր առաջարկներ ունեն:
Ուսանողուհի Ռաիսա Սողոմոնյանը, իր ելույթում թվարկելով ֆինանսիստին անհրաժեշտ գիտելիքները, հմտություններն ու իմացությունները, կարևորում է նաև նրա անձնային որակները, բարոյական, էմոցիոնալ կայունությունը, ստեղծարար լինելու կարողությունը` առաջարկելով կրթամասում ավելացնել գործնական պարապմունքներին հատկացվող ժամաքանակը:
Քննարկման մասնակից ուսանողները ներկայացրել են տարբեր առաջարկություններ, որոնք, ամբիոնի վարիչի հավաստմամբ, կուսումնասիրվեն և հաշվի կառնվեն: