Արցախի պետական համալսարանի 50-ամյակի և ՀՀ անկախության տոնի առթիվ պատմության և իրավագիտության ֆակուլտետում կազմակերպվել է ինտելեկտուալ խաղ:
Նախաձեռնությունը «Քաղաքագիտություն» մասնագիտության 4-րդ կուրսի ուսանողուհի Լուսինե Օհանյանինն էր, ում խոսքով` խաղի նպատակն է զարգացնել ուսանողների ինտելեկտուալ մտածելակերպը, նպաստել նոր գիտելիքների ձեռքբերմանը, ներգրավել նրանց համալսարանական կյանքին և կազմակերպել արդյունավետ ժամանց:
«Նման միջոցառումները ոչ միայն ավելի հետաքրքիր ու բովանդակալից են դարձնում ուսանողական առօրյան, այլև հնարավորություն են տալիս բացահայտել և համախմբել համալսարանի խելացի և ակտիվ ուսանողներին»,- ասել է Լուսինե Օհանյանը:
Խաղի ընթացքում հնչել են տարբեր ոլորտների առնչվող տրամաբանական հարցեր:
Պատմության և իրավագիտության ֆակուլտետի ՈՒԽ նախագահ Աշխեն Ասրյանի խոսքով՝ վերջին տարիներին բուհում մեծ զարգացում են ապրում ուսանողական կյանքն ակտիվացնող բազմաբովանդակ միջոցառումները:
«Ուսանողն այսօր կարևորում է գիտելիքը և կարողանում է մրցել իր գիտելիքներով: Կազմակերպվող միջոցառումների առանցքային նպատակներից մեկը ուսանողին գիտելիք տալն է, ինչի լավագույն տարբերակներից է նաև նման խաղ-մրցույթների կազմակերպումը»,-ասել է նա:
Հաղթող թիմերը պարգևատրվել են պատվոգրերով: