Նոր ուսումնական տարվան ընդառաջ Արցախի պետական համալսարանում նախապատրաստական աշխատանքներ են տարվում: Մայր բուհը պլանավորում է առաջին կուրսեցիներին դիմավորելու և իրազեկման հետ կապված մի շարք աշխատանքներ:
«Երկար ընդմիջումից հետո ուսանողությունը հնարավորություն կունենա անցնելու առկա ուսուցման համակարգին: Ինչպես արդեն գիտենք, սեպտեմբերի 1-ից համալսարան են հաճախելու առաջին կուրսեցիները և դա մեզ համար լրացուցիչ հնարավորություն է նրանց հետ նախատեսվող աշխատանքները լիարժեք կազմակերպելու համար»,-ասել է ՈւՇՀՀՏԱԳ պրոռեկտոր Վ. Յարամիշյանը` հավելելով, որ այն ուսանողները, ովքեր ամենաբարձր միավորներով են ընդունվել, առաջինը հանդիպում կունենան համալսարանի ռեկտորի հետ: Պատասխանատուները ուսումնական տարվա առաջին շաբաթը կօգտագործեն առաջին կուրսեցիներին համալսարանական կյանքին, գործող կանոնադրություններին, իրենց իրավունքներին և պարտականություններին ծանոթացնելու համար, ինչպես նաև կնախապատրաստվեն հիմնական ուսանողական խմբերի պարապմունքների անցկացմանը, որը կսկսվի սեպտեմբերի 7-ից:
Ուսանողների հետ տարվող աշխատանքների և կարիերայի բաժնի պատասխանատու Վահե Գալոյանի խոսքով նախատեսվում է առաջին կուրսեցիներին դիմավորելու, համալսարանական ներքին կանոններին ու կառույցներին ծանոթացնելու աշխատանքները կազմակերպել ուսանողական խորհրդի հետ համատեղ ջանքերով: Համապատասխան խմբերը ուսանողներին կուղեկցեն մինչև իրենց լսարանները, որտեղ նրանց հետ կհանդիպեն կուրսղեկները: Առաջին կուրսեցիները հանդիպումներ կունենան ֆակուլտետների դեկանների և համապատասխան կառույցների ներկայացուցիչների հետ: Առաջիկայում նախատեսվող միջոցառումների կազմակերպումը կախված կլինի համաճարակի հետագա ընթացքից և զարգացումից: Ավանդական միջոցառումներից բացի, նախատեսվում է նաև նոր ձևաչափով այլ միջոցառումներ կայնքի կոչել: «Եթե ստեղծվեն լիարժեք հնարավորություններ, ապա կիրականացնենք մի շարք բովանդակալից ծրագրեր»,-նշել է Վ. Գալոյանը: