Սեպտեմբերի 9-ին Արցախի պետական համալսարանում դասախոսությամբ հանդես է եկել հայ-հունական ծագում ունեցող, Հայոց ցեղասպանությունը վերապրածի թոռ, դոկտոր Մարինա Մխիթարյանը: Արդեն երկու շաբաթ է, ինչ նա Արցախում է՝ «Արցախի կանայք՝ պատերազմ, ինքնություն և խաղաղություն» վավերագրական լուսանկարչական պրոյեկտի համար նյութեր հավաքելու նպատակով, և որպես առաքելություն` ցանկություն է հայտնել մայր բուհի ուսանողությանը ներկայացնել իր անցած հայանպաստ ուղին և հանդես գալ «Խաղաղության հրեշտակը» խորագրով դասախոսություն-պրեզենտացիայով:
ԱրՊՀ լրատվության և հասարակայնության հետ կապերի բաժնի պետ, բ.գ.թ., դոցենտ Զ. Սառաջյանը ներկայացրեց բանախոսի կեսագրությունը` նրան անվանելով խաղաղության դեսպան, ով շրջում է աշխարհից աշխարհ և քարոզում խաղաղություն, ում բոլոր աշխատանքների առանցքում հենց խաղաղասիրության թեման է: Զ. Սառաջյանը իր խոսքում շնորհակալություն է հայտնել դոկտոր Մարինա Մխիթարյանին նման կարևոր առաքելության համար և նշել. «Եթե յուրաքանչյուր մարդ իր հոգում թեկուզ մեկ կաթիլ կրի այդ խաղաղասիրության կամքը և քարոզի, ապա աշխարհում այսքան չարիքներ և պատերազմեր չեն լինի»:
Դոկտոր Մարինա Մխիթարյանը ներկաներին ցուցադրել է իր լուսանկարները, որոնց բովանդակությունը խաղաղությունն է, շեշտադրումը՝ խաղաղասիրությունը: Նա ներկայացրել է իր անցած ուղին, պատմել իր լուսանկարների հերոսների մասին, ովքեր պատմել են իրենց և իրենց նախնիների անցած ճանապարհը` ցեղասպանություն ու պատերազմներ վերապրածների ճակատագրերով:
«Հիանում էի բոլոր այն հերոսներով, ովքեր ամենայն նրբությամբ հիշում էին իրենց մանկության ամենաչնչին դրվագներն անգամ: Հիշողությունը այնպիսի մի ուժ է, որը, չնայած բոլոր կուրուստներին, մարդուն հույս և հավատ է տալիս առաջ գնալու, և իմ բոլոր հերոսները դրա վառ ապացույցն են»,- ասել է Մ. Մխիթարյանը՝ հավելելով, որ այսօր նա Արցախում է, քանի որ Արցախն է համայն հայության խաղաղության և միասնության հրեշտակը:
Մ. Մխիթարյանը պատասխանել է նաև ներկաների հարցերին: