Այսօր` սեպտեմբերի 9-ին, բարձր միավորներով Արցախի պետական համալսարան ընդունված մի խումբ առաջին կուրսեցիների համար կազմակերպվել է արշավ դեպի ‹‹Տիգրանակերտ›› պետական պատմամշակութային արգելոց:
Հիշեցնենք, որ նախորդ արշավը կազմակերպվել էր դեպի Կատարո վանք: ԱրՊՀ ուսանողների համար արշավները դեպի Արցախի պատմամշակութային վայրեր շարունակական են լինելու: Նպատակը հայրենաճանաչողությունն է, ուսումնական առօրյան ավելի հետաքրքիր ու բովանդակալից դարձնելը: Արշավներն իրականացվում են ԱրՊՀ ղեկավարության, ուսանողների հետ տարվող աշխատանքների և կարիերայի բաժնի, ինչպես նաև ուսանողական խորհրդի աջակցությամբ: Ուսանողների խոսքով` նմանատիպ միջոցառումներն անհրաժեշտ են և պատմաճանաչողական նշանակություն ունեն մասնակիցների համար:
«Կերպարվեստ» մասնագիտության առաջին կուրսի ուսանողուհի Լիլիթ Մաթևոսյանը, ով նույնպես ընդգրկված է եղել արշավին, կիսվել է տպավորությամբ և նշել. «Իմ կարծիքով, նման արշավները հնարավորություն են տալիս ոչ միայն ճանաչելու մեր հայրենիքը, այլև բացահայտելու ինքներս մեզ ու օգնելու դառնալ ավելի ճիշտ ու հայրենասեր քաղաքացի։ Հուսով եմ` նմանատիպ արշավները շարունակական կլինեն և մեր այս արշավների շարքը վարակիչ կլինի նաև մյուս կրթական հաստատությունների համար»:
Արմինե Այվազյանը, ով սովորում է «Հայոց լեզու և գրականություն» մասնագիտության առաջին կուրսում, նշել է, որ այցելելով Տիգրանակերտի ամրոց և Վանքասար՝ տեղեկացել են պատմամշակութային կոթողների մասին հետաքրքիր ու գրավիչ պատմություններից։
«Շատ տպավորված եմ: Բոլորը շատ անմիջական էին, և բոլորիս ջերմ, ուրախ ու ակտիվ ժամանցը ապահովված է: Օրվա ամենակարևոր ձեռքբերումներից մեկը նոր ընկերներն էին, որոնց հետ ծանոթացա արշավի ընթացքում »,- ասել է նա:
«Կառավարում» մասնագիտության առաջին կուրսի ուսանող Վահե Ասրիյանը նշել է, որ ճիշտ ընտրություն է կատարել համալսարանի և մասնագիտության ընտրության հարցում, և դրա վառ ապացույցը բարձր առաջադիմությամբ ընդունվածներին որպես խրախուսանք արշավի մասնակից դարձնելն էր: Նա նույնպես կիսվել է տպավորություններով և նշել. «Հաճելին, օգտակարն ու տպավորիչը մեկտեղված էին: Հոգևոր մեծ էներգիա ստանալով վերադարձանք տուն՝ ակնկալելով մասնակցելու նաև առաջիկայում նախատեսվող արշավներին»:
