Արցախի պետական համալսարանում դասերն ընթանում են բնականոն հունով: Պարապմունքների վերսկսման առաջին օրերի համեմատ ուսանողների հաճախումները դասերին պարբերաբար աճում են: Բանասիրական ֆակուլտետի դեկան Լ. Մարգարյանի խոսքով` ուսանողների հաճախումների թիվը տատանողական է: Արցախում գտնվող ուսանողների թիվն ավելին է, քան ամենօրյա հաճախումների գրանցումներն են ցույց տալիս, քանի որ ուսանողների մի մասն ունի կացարանի կամ տրանսպորտի հետ կապված խնդիրներ:
«Առաջին շաբաթվա ընթացքում դժվար էր դասապրոցեսն իր հունով շարժել, ավելի շատ դասերն ընթանում էին խորհրդատվական կարգով՝ միմյանց սատարելուն, ավելի միասնական լինելուն ուղղված»,- նշել է Լ. Մարգարյանը՝ հավելելով, որ այս պահին դասերն ընթանում են բնականոն հունով և ուսանողության շրջանում տրամադրվածությունն ավելի լավատեսական և մեծ ուժ տվող է:
«Աշխարհագրություն» մասնագիտության 4-րդ կուրսի ուսանողուհի Մարիամ Ասրյանի խոսքով` հետպատերազմյան իրավիճակն ուսանողները հաղթահարում են կարդալով, սովորելով և աղոթելով:
«Հիմա, ավելի քան երբևէ, պետք է լինենք սթափ և աշխատասեր, որպեսզի աջակցենք և մասնակից լինենք մեր երկրի առջև ծառացած խնդիրների լուծմանը: Պիտի ապրենք ու արարենք բոլոր նրանց համար, ովքեր չապրեցին»,- նշել է Մ. Ասրյանը:
«Հայոց լեզու և գրականություն» մասնագիտության 3-րդ կուրսի ուսանողուհի Սրբուհի Համբարձումյանը դասապրոցեսի ընթացքի մասին նշել է, որ չնայած հետպատերազմյան դառը իրականությանն ու ստեղծված ծանր իրավիճակին, ուսանողությունն ամեն կերպ փորձում է ապահովել ներկայությունը դասերին և ձգտում է վերադառնալ նախկին ուսանողական կյանքին:
«Մենք՝ ուսանողներս, որպես մեր մի բուռ հայրենիքի ապագան կերտողներ, պարտավոր ենք ներկայանալ դասերին, որպեսզի մեր ձեռք բերած գիտելիքները կարողանանք ի նպաստ մեր երկրի բարօրության օգտագործել»,- իր խոսքում նշել է Ս. Համբարձումյանը: