Դեկտեմբերի 19-ից 21-ը Արցախում և Հայաստանի Հանրապետությունում սուգ է հայտարարված: Սեպտեմբերի 27-ին Արցախի Հանրապետության դեմ սանձազերծված պատերազմի զոհերի հիշատակը հարգել են նաև ԱրՊՀ-ում: Արցախի պետական համալսարանի մի խումբ ուսանողներ մայր բուհի զոհված ուսանողների հիշատակը հավերժացնող հուշակոթողի մոտ հարգանքի տուրք են մատուցել արցախյան պատերազմում անմահացած մեր նահատակաների հիշատակին:
«Մենք պետք է հասկանանք, որ մեր հերոսների թափած արյունը անտեղի չէր, և կրկին կծնվեն հերոսներ, որովհետև մենք աշխարհում ունենք ամենաթանկը՝ մեր քաջորդիների արյամբ շաղախված հայրենիք»,- նշել բ.գ.թ., դոցենտ Զ. Բալայանը՝ հավելելով, որ հանուն նոր ապագայի պետք է ցույց տանք, որ արցախցին է իր հողի տերը ու այն շենացնողը:
«Մոնթե, Լեոնիդ, Պետո, Ռոբերտ և Ալբերտ, մերօրյա նահատակներ, խոնարհվում ենք Ձեր շիրիմներին: Մենք, հանդիսանալով մեր հայրենիքի ժառանգները, պետք է կրկին Աստծո զորությամբ վերածնվենք և մոխիրներից վեր հառնենք»,- ուսանողության անունից նշել է «Հայոց լեզու և գրականություն» մասնագիտության առաջին կուրսի ուսանողուհի Մարիամ Պողոսյանը:
Ուսանողները ծաղիկներ են խոնարհել հուշակոթողին և երդվել միշտ վառ պահել մեր սուրբ նահատակաների անմար հիշատակը: