Գիրք նվիրելու օրը ԱրՊՀ բանասիրական ֆակուլտետում նշանավորվեց գիրք նվիրելով, իսկ պատմության և իրավագիտության ֆակուլտետում՝ ինտելեկտուալ խաղով։
«Գիրք նվիրելու օրը բազմախորհուրդ է։ Հիշենք, որ գիրք նվիրելով՝ ինքներս մեզ և մեր շրջապատին նվիրում ենք հոգևոր հաղորդակցման հաճելի րոպեներ»,- նշեց բանասիրական ֆակուլտետի ՈՒԽ նախագահ Ինեսսա Առուստամյանը՝ կարևորելով գրքի արժեքը և շնորհավորելով բոլոր ընթերցասեր ուսանողներին։
Պատմության և իրավագիտության ֆակուլտետում տոնի կապակցությամբ ՈՒԽ և ՈՒԳԸ համատեղ ջանքերով կազմակերպվեց ինտելեկտուալ խաղ։ Ֆակուլտետի ՈՒԽ նախագահ Արա Սարգսյանի խոսքով` գրքի արվեստը զարգացնելը շատ արդիական խնդիր է ներկայիս գիտատեխնիկական արագ զարգացող դարում։
«Խաղի հիմնական նպատակն էր բարձրացնել ուսանողների իրազեկվածության աստիճանը, հնարավորություն տալ ավելի լայն մտահորիզոն ունենալու: Նմանօրինակ խաղերը նաև ինչ-որ չափով աշխուժացնում են ուսանողների առօրյան»,- իր խոսքում նշել է Ա. Սարգսյանը՝ հավելելով, որ նման բնույթի միջոցառումների կազմակերպումը շարունակական կլինեն: