Փետրվարի 8-ից մեկնարկել է ԱրՊՀ ավարտական խմբերի ուսանողների ակտիվ փորձուսուցումը: Փորձուսուցման շրջանակում «Հոգեբանություն» մասնագիտության 4-րդ կուրսի ուսանողները այս օրերին իրենց գիտելիքներն ու հմտությունները կիրառում և ամրապնդում են Ստեփանակերտի Ք. Քոքսի անվան վերականգնողական կենտրոնում:
Փորձուսուցման ղեկավար Իննա Մկրտչյանի խոսքով` ուսանողների փորձուսուցման առաջին երկու շաբաթն անց է կացվել հանրակրթական դպրոցներում, իսկ հաջորդ երկու շաբաթը, ուսանողների ցանկությամբ, որպես փորձուսուցման անցկացման վայր է ընտրվել Ստեփանակերտի Ք. Քոքսի անվան վերականգնողական կենտրոնը:
«Հոգեբանություն» մասնագիտության 4-րդ կուրսի ուսանողուհի Քրիստինե Սահակյանի խոսքով` փորձուսուցման ընթացքում ուսանողներին հնարավորություն է ընձեռվում համալսարանում ստացած տեսական գիտելիքները և հմտությունները կիրառել գործնականում, ամրապնդել իմացությունները, ձեռք բերել նոր հմտություններ:
Փորձուսուցումը կտևի մինչև մարտի 6-ը: