Կանանց միջազգային օրվա առթիվ մարտի 8-ին ԱրՊՀ մանկավարժության և սպորտի ֆակուլտետի ՈՒԳԸ նախաձեռնությամբ կազմակերպվել է «Կանանց միջազգային օրվա խորհուրդն ու կարևորությունը հետպատերազմյան շրջանում» խորագրով միջոցառում:
Միջոցառումը սկսելուց առաջ ներկաները մեկ րոպե լռությամբ հարգել են արցախյան պատերազմում զոհված բոլոր քաջորդիների հիշատակը:
«Հազարավոր ընտանիքներում գարուններ են մարել: Այդ առյուծ տղաների թանկ կյանքի գնով է, որ այսօր մենք կանք ու գարուն ենք ապրում»,- նշել է ֆակուլտետի ՈՒԳԸ նախագահ Է. Արզումանյանը:
Միջոցառման մասնակիցները ներկայացրին կանանց տոնի նախապատմությունը, թե մարտի 8-ն ինչպես և ում շնորհիվ հռչակվեց Կանանց միջազգային օր: Այնուհետև ուսանողներն իրենց ելույթներում ներկայացրել են կանանց իրավունքների մասին կատարած ուսումնասիրություններն ու կարևորել օրվա խորհուրդը:
Միջոցառմանը ներկա էին ֆակուլտետի դեկան Շ. Այդինյանը, ամբիոնների վարիչներ, դասախոսներ և ուսանողներ:
Ֆակուլտետի դեկան Շ. Այդինյանը շնորհավորել է ներկաներին՝ մաղթելով ամենանվիրական երազանքների իրականացում և անսպառ սեր՝ կյանքի թելադրած բոլոր փորձությունները հաղթահարելու համար:
«Հայ կնոջ կերպարը մեր պատմության ամենալուսավոր էջերից է: Ցանկանում եմ, որ բոլորդ Ձեր տաղանդով և կատարելությամբ աշխարհին ի ցույց դնեք հայ կնոջ ստեղծարար ու արարող տեսակը»,- նշել է նա:
Մանկավարժության և հոգեբանության ամբիոնի վարիչ Է. Բաղդասարյանը նույնպես շնորհավորել է բոլոր կանանց և աղջիկներին տոն օրվա կապակցությամբ և նշել. «Երբ թերթում ենք մեր պատմության էջերը, տեսնում ենք, որ միայն զորեղ մայրերն են կարողացել ծնել, սնել, դաստիարակել և իրենց ազգին տալ ամենաթանկը՝ հարազատ որդիների կյանքը: Մենք ազգովի երախտապարտ ենք և գլուխ ենք խոնարհում նման հայ մայրերի առջև»:
Միջոցառուման ընթացքում ուսանողները հանդես են եկել նաև ասմունքով ու երաժշտական համարներով:
