Մարտի 15-ին Արցախի պետական համալսարանում դասախոսությամբ հանդես են եկել բ.գ.դ., պրոֆեսոր Դավիթ Գասպարյանն ու պ.գ.թ., դոցենտ Գագիկ Սաֆարյանը: Դասախոսության թեման առնչվում էր 100 տարի առաջ կնքված Մոսկվայի պայմանագրին:
ԱՀ ԿԳՄՍ նախարար Լ. Ղարախանյանը ողջունել է ներկաներին՝ նշելով, որ այս օրերին շատ կարևոր են նմանօրինակ այցելությունները, քանի որ դրանց արդյունքում մեր երկրի ապագայի նկատմամբ հավատը դառնում է ավելի ամուր և իրատեսական:
«Մենք կարճ ժամանակահատվածում պետք է վերականգնվենք, կրթության միջոցով պետք է ավելի ուժեղանանք, միշտ պետք է հիշենք, որ աշխարհում հաղթում են կրթության և գիտության շնորհիվ»,- ասել է Լ. Ղարախանյանը:
Պ.գ.թ., դոցենտ Գագիկ Սաֆարյանը, ով եղել է նաև «Ղարաբաղ» կոմիտեի հիմնադիրներից, ներկայացրել է 1921թ. մարտի 16-ին կնքված Մոսկվայի պայմանագրի պատմական հետևանքները և զուգահեռներ անցկացրել ներկայումս տիրող իրավիճակի հետ: Նրա խոսքով Արցախյան շարժման հարցը միշտ էլ բարձր է դասվել տարբեր բնագավառների ներկայացուցիչների կողմից:
«Մենք պետք է կարողանանք պատմությունից ճիշտ դասեր քաղել: Այսօր, ավելի քան երբևէ, մենք պետք է գործենք մեծ եռանդով և համախմբվածությամբ»,- նշել է բանախոսը՝ հավելելով, որ Արցախում ապրող յուրաքանչյուր ոք հերոս է, իսկ Արցախի պետական համալսարանի ուսանողները ազգապահպան գործին իրենց մասնակցությունն ապահովում են մայր բուհի կողմից իրենց առջև դրված պահանջները իրագործելով և գիտելիքները անընդհատորեն հարստացնելով:
Գագիկ Սաֆարյանը, ով նաև «Պաշտպան հայրենյաց» ազգային մշակութային հիմնադրամի նախագահն է, հանդիպման ընթացքում պատրաստակամություն է հայտնել համալսարանի գրադարանը համալրել անհրաժեշտ գրքերով, եթե համալսարանականները ներկայացնեն պահանջվող գրքերի ցանկը:
Բ.գ.դ., պրոֆեսոր Դավիթ Գասպարյանը իր ելույթում նշել է, որ Արցախի հետ իր կապը շատ ամուր է և այն երկար տարիների պատմություն ունի: Հերթական անգամ Արցախ այցելել է` իր աչքերով տեսնելու հետպատերազմյան իրականությունը և մոտիկից ծանոթանալու դրանից բխող հարցերին:
«Ազգի գոյատևման գլխավոր նախապայմաններից մեկը իր մշակութային արժեքների շուրջ համախմբվելն է: Ոգին կորցնելուց հետո մարմինը հեշտ է կորցնելը: Մենք պետք է ելք գտնենք ստեղծված իրավիճակից դուրս գալու համար, պետք է ապրենք, արարենք, վերակառուցենք՝ չմոռանալով մեր երազանքների մասին»,- նշել է Դ. Գասպարյանը՝ հավելելով, որ յուրաքանչյուր ոք պետք է իմանա իր անելիքները՝ նոր և առաջընթացիկ ծրագրեր մշակելով:
Հանդիպման ընթացքում բանախոսները պատասխանել են նաև ուսանողների և դասախոսների հարցերին: