Մարտի 16-ին Արցախի պետական համալսարանի բնագիտական ֆուկուլտետի ուսանողները նշեցին «π» թվի միջազգային օրը՝ աշխարհում նշվող ամենաարտասովոր տոներից մեկը: Միջոցառումը նախաձեռնել էր ֆակուլտետի ուսանողական գիտական ընկերության նախագահ Ալիսիա Դադայանը, որին հրավիրված էին նաև մաթեմատիկայի ամբիոնից դասախոսներ և ուսանողներ:
Տոնի կապակցությամբ ուսանողներին շնորհավորել է ամբիոնի վարիչ Լ. Աբրահամյանը և ողջունելի համարել նմանօրինակ միջոցառումների նախաձեռնումն ու իրականացումը:
«Արդեն մի քանի տարի է` տարբեր ձևաչափերով նշվում է «π» թվի միջազգային օրը: Վստահ եմ, որ այս անգամ ևս բոլորդ մեծ տպավորություններ և մասնագիտական գիտելիքներ կստանաք»,- նշել է նա:
«Մաթեմատիկան մի գիտություն է, որի գաղափարները, դատողությունները և խորհրդանիշները ծառայում են որպես լեզու: Այն բացատրում է դժվարին երևույթների օրինաչափությունները, կանխագուշակում այն մեծ ճշգրտությամբ և նախօրոք նկարագրում երևույթների ընթացքը»,- իր խոսքում նշել է միջոցառման նախաձեռնող Ա. Դադայանը՝ հավելելով, որ առանց մաթեմատիկայի անհնար է պատկերացնել գիտական և տեխնիկական առաջընթաց:
Ուսանողները «π» թվի միջազգային օրը նշեցին յուրահատուկ կերպով, մանրամասն ներկայացրին երկրաչափական, դասական և համակարգչային հաշվարկների դարաշրջանում տոնի նախապատմությունը, «π» թվի կիրառությունը, հատկությունները և նշանակությունը երկրաչափության մեջ:
