Մարտի 17-ին Արցախի պետական համալսարանի պատմության և իրավագիտության ֆակուլտետի պատմության և քաղաքագիտության ամբիոնի վարիչ, պ.գ.թ., դոցենտ Ն. Սարումյանի նախաձեռնությամբ կազմակերպվել է կլոր սեղան-քննարկում՝ «Մոսկվայի և Կարսի պայմանագրերի պատմական, իրավական կողմերը և արդիականացումը»: Կլոր սեղան-քննարկմանը ներկա են եղել ֆակուլտետի դեկան Ա. Խաչատրյանը, իրավունքի ամբիոնի վարիչ Գ. Արզումանյանը, ամբիոններից դասախոսներ և ուսանողներ:
Պ.գ.թ., դոցենտ Ն. Սարումյանը, կարևորելով թեմայի քննարկման անհրաժեշտությունը, նշել է, որ պետք է կարողանանք պատմությունից ճիշտ դասեր քաղել և չկրկնել նույն սխալները:
«Այսօր ապրում ենք մի այնպիսի ժամանակաշրջանում, երբ կարևոր է նման թեմաների շուրջ քննարկումների, տեսակետների համադրություններ կատարելը: Շրջանառվում է այն թյուր միտքը, թե իբրև Մոսկվայի և Կարսի պայմանագրերի 100 տարին լրանալուն զուգահեռ պետք է ինչ-որ դրական փոփոխություններ տեղի ունենան հօգուտ հայ ժողովրդի»,- նշել է նա:
Ուսանողները քննարկման ընթացքում հանդես են եկել ելույթներով, որոնցում մանրամասն ներկայացվել են պայմանագրերի պատմական, իրավական, քաղաքական կողմերը՝ միաժամանակ փորձելով դրանք արդիականացնել:
«Սխալ եզրակացությունների հիմնական պատճառն այն է, որ հասարակության տարբեր խավեր տեղյակ չեն պայմանագրերի որպիսությանը և դրանց իրական տեսքին: Նախ պետք է վերլուծել քաղաքական իրավիճակը՝ զուգահեռներ տանելով 1921 և 2021 թվականների միջև, ապա կատարել վերլուծություններ»,- նշել է քննարկման ակտիվ մասնակից՝ «Իրավագիտություն» 1-ին կուրսի ուսանողուհի Աստղիկ Բաբայանը՝ հավելելով, որ նմանատիպ քննարկումները ուսանողներին տալիս են արդիական եզրակացություններ անելու և սխալ վերլուծություններից զերծ մնալու հնարավորություն: