Մանկավարժության և սպորտի ֆակուլտետի ուսանողական գիտական ընկերության հերթական նախաձեռնությամբ ֆակուլտետի տարբեր կուրսերի հետ կազմակերպվել է ինտելեկտուալ խաղ-մրցույթ: Ֆակուլտետի դեկան Շ. Այդինյանը, ողջունելով ներկաներին, նշեց, որ ֆակուլտետի ուսանողները նմանօրինակ միջոցառումների երկարատև փորձ արդեն իսկ ունեն, միշտ էլ մեծ ոգևորությամբ և պատասխանատվությամբ են մասնակցել թե՛ ներֆակուլտետային, թե՛ համալսարանական փուլերին:
«Ողջունելի է, որ երկարատև դադարից հետո վերսկսել եք գիտական և ժամանցային բնույթի միջոցառումների կազմակերպումն ու անցկացումը: Ինտելեկտուալ խաղի կազմակերպման կարևոր նախապայմաններից մեկն այն է, որ ուսանողներից յուրաքանչյուրը թիմային կազմով ցուցաբերում է իր ունեցած գիտելիքները»,-նշել է Շ. Այդինյանը՝ հավելելով, որ այսօրինակ միջոցառումները պետք է շարունակական լինեն և ունենան նաև թեմատիկ ուղղվածություն՝ միևնույն մասնագիտության խմբերի հետ ևս հարցադրումներ և քննարկումներ անցկացնելով:
«Ինելեկտուալ խաղի նպատակն էր ստուգել ուսանողների մտքի ճկունությունը, զարգացնել նրանց վերլուծական մտածողությունը և ինչու չէ նաև ապահովել հաճելի ժամանց»,- նշել է ֆակուլտետի ուսանողական գիտական ընկերության նախագահ Է. Արզումանյանը:
Խաղին մասնակցել են տարբեր կուրսերից հավաքական ութ թիմեր: Արդյունքում հաղթող ճանաչված թիմերը խրախուսվել են պատվոգրերով: