Ապրիլի 2-ը աշխարհում նշվում է որպես աուտիզմի իրազեկման միջազգային օր: Այն ՄԱԿ-ի առողջապահությանը նվիրված յոթ միջազգային օրերից մեկն է: Օրվա կապակցությամբ մանկավարժության և հոգեբանության ամբիոնի մ.գ.թ., ավագ դասախոսի պաշտոնակատար Արմինե Բաղդասարյանը «Տարրական մանկավարժություն և մեթոդիկա» մասնագիտության 4-րդ կուրսի ուսանողների հետ կազմակերպել է դաս-միջոցառում՝ «Աուտիզմը և նրա առաջացման պատճառները» թեմայով:
«Աուտիզմի վերաբերյալ հասարակության իրազեկման բարձրացումը օրեցօր դառնում է արդիական, ուստի այսօրվա դաս-միջոցառման հիմնական նպատակն է քննարկման դնել աուտիզմը, նրա առաջացման պատճառները, դրսևորումները և այն վտանգները, որոնցից պետք է խուսափել»,- նշել է Ա. Բաղդասարյանը՝ ներկայացնելով նաև աուտիզմի գիտական բացատրությունը, ուսումնասիրման պատմությունն ու հատկանիշները:
Ուսանողները նախապես առանձնացրել են այն բոլոր հիմնահարցերը, որոնք ուսումնասիրության կարիք ունեն, ներկայացել թեմատիկ զեկուցումներով և ծավալել ակտիվ քննարկում: