Ապրիլի 9-ին ԱրՊՀ տարբեր ստորաբաժանումների անդամների և ուսանողության հետ հանդիպել են «Մտավորականները հանուն Արցախի» շարժման նախաձեռնողներ Աշոտ Բաբայանը և Յուրի Զաքարյանը: Հանդիպումը կայացել է ԱրՊՀ-ում մեկնարկած «Արցախ. ներկան և ապագան» ծրագրի շրջանակներում: Հանդիպմանը նորաստեղծ շարժման նախաձեռնող խումբը ներկայացրել է կազմակերպության գործունեության տեսլականը, հիմնական անելիքները` կապված Արցախի և առկա խնդիրների լուծման հետ:
«Մեր նպատակն է ներկայիս իրավիճակում ստեղծել համազգային շարժում, որը պետք է համախմբի մտավորականությանը և որը պետք է գլխավորի հենց մտավորականությունը: Մենք հույս ունենք, որ նման կարգի հանդիպումներն ու մտավորականության հետ համագործակցությունն իրենց դրական արդյունքը կունենան՝ ի նպաստ մեր երկրի և ժողովրդի»,- նշել է Ա. Բաբայանը:
Յուրի Զաքարյանի խոսքով` նման շարժում ունենալու գաղափարը դեռ երկու տարի առաջ էր ծագել, և ստեղծված մտավորական շարժումը պետք է զբաղվեր հրատապ հարցերի քննարկմամբ, առաջարկությունների և կարծիքների համակարգմամբ, նոր ուղիների որոնմամբ ու տարաբնույթ խնդիրների լուծմամբ:
«Ցանկացած բարդ իրավիճակից էլ ելք կարելի է գտնել, պարզապես այդ որոնման ուղիները պետք է լինեն նպատակային և համակարգված»,- նշել է Յ. Զաքարյանը՝ հավելելով, որ առաջիկայում տարբեր հարցերի շուրջ կարող են նաև կլոր սեղան-քննարկումներ կազմակերպել՝ առավել մանրամասն կարծիքներ և փաստեր վերհանելու նպատակով: