Ապրիլի 14-ին Արցախի պետական համալսարանում նշվել է Համո Սահյանի ծննդյան 107-ամյակը: Գրական-գեղարվեստական միջոցառումը կազմակերպվել է բ.գ.թ., դոցենտ Զարինե Սառաջյանի նախաձեռնությամբ՝ «Հայ գրականության պատմություն» մասնագիտացման մագիստրատուրայի առաջին կուրսի ուսումնական ծրագրում ընդգրկված «Համո Սահյանը և պանթեիզմը» դասընթացի շրջանակում:
«Այս օրերին ինքներս մեզ ապրեցնելու համար պետք է ամուր կառչենք մեր ազգային արժեքներին, հիմնասյուներին և ապրելու ուժ ստանանք դրանցից: Համո Սահյանի պոեզիան այն սնուցող երակներից է, որ ապրեցրել , ապրեցնում և ապրեցնելու է հային, որտեղ և ինչ իրավիճակում էլ լինի»,- ողջույնի խոսքում նշել է Զ. Սառաջյանը՝ հավելելով, որ բանաստեղծը իր պոեզիայում արծարծել է այնպիսի խնդիրներ, որոնք այսօր էլ արդիական են՝ արտագաղթ, մայրենի լեզվի պահպանում, հայրենի տան պաշտամունք, հայրենասիրություն և այլն:
«Այսօրվա միջոցառումը կրկին ու կրկին ապացուցեց, որ բոլոր հավերժ ապրողների առաջին շարքում է Համո Սահյանը և քանի դեռ ունենք այսպիսի սերունդ, դեռ երկար է ապրելու նրա անունն ու գործը, Արցախը և արցախցին»,- նշել է բ.գ.դ, պրոֆեսոր Սոկրատ Խանյանը:
Գրականության և ժուռնալիստիկայի ամբիոնի վարիչ, բ.գ.թ, Նոնա Դավթյանը, խոսելով Հ. Սահյանի պոեզիայի մասին, նշել է.
«Ծնվեց Համո Սահյանը, որին այսօր մեկ անգամ ևս ասում ենք՝ Ձեզ բացակա չենք դնի: Նա իր ծնունդով նոր գույներ ավելացրեց գրականությանը: Այդ գույները հայրենի բնաշխարհի ներկապնակից են վերցված, նրա պոեզիան սնուցող երակը հայրենի, այլևս երգ դարձած, Որոտանն է»:
«Ստեփանակերտ» թերթի խմբագիր, բանաստեղծուհի Սոֆյա Սարգսյանի խոսքով՝ Համո Սահյանը հայ քնարերգության մեջ ստեղծել է ամենանուրբ և քնքուշ պոեզիան, որը միշտ արդիական է և շատ-շատերին է իր քնարական շնչով մղել դեպի բանաստեղծությունը:
«Ես Համո Սահյանի արվեստով ապրող անհատ եմ: Նրա յուրաքանչյուր ստեղծագործություն այնքան նուրբ է ու գեղեցիկ, որ ոգիդ պարուրվում է ամենաջերմ զգացողություններով»,-նշել է Ս. Սարգսյանը՝ հավելելով, որ այնքան պատկերավոր է Համո Սահյանի պոեզիան, որ քեզնից անկախ ընկղմվում ես նրա մեջ և փոխում նաև աշխարհայացքդ:
«Համո Սահյանը 20-րդ դարի երկրորդ կեսի ամենապայծառ անհատականություններից է: Նա ստեղծել է քարափների, ջրվեժների ու ծիածանների մի գունագեղ աշխարհ, ուր ապրող մարդը ևս օժտված է իրեն ծնող միջավայրի վեհությամբ ու խորությամբ»,- իր ելույթում նշել է «Հայ գրականության պատմություն» մասնագիտացման մագիստրատուրայի առաջին կուրսի ուսանողուհի Սոնա Մուսայելյանը:
Միջոցառման ընթացքում հնչել են ելույթեր Հ. Սահյանի կյանքի ու գրական գործունեության մասին, բնապաշտության, խոհափիլիսոփայության, հայրենիքի և լեզվի հանդեպ նրա տածած սիրո և այլ թեմաներով գրված ստեղծագործությունների վերաբերյալ: Միջոցառմանը ասմունքով հանդես են եկել տարբեր ֆակուլտետներից ուսանողներ: