ԱրՊՀ բանասիրական ֆակուլտետի ուսանողական գիտական ընկերության նախաձեռնությամբ կազմակերպվեց առցանց հանդիպում արդի գրող Դավիթ Սամվելյանի հետ։ Հանդիպմանը մասնակցել են գրականության և ժուռնալիստիկայի ամբիոնի վարիչ Նոնա Դավթյանը, ամբիոնից դասախոսներ, ուսանողներ ինչպես բանասիրական, այնպես էլ բնագիտական, պատմության և իրավագիտության ֆակուլտետներից:
Գրականության և ժուռնալիստիկայի ամբիոնի վարիչ Նոնա Դավթյանը կարևորեց ազգային գրականության դերը՝ նշելով, որ միայն ազգայինն է մեր փրկությունը։
«Հանդիպման ընթացքում կարևորվեց ազգ-գրականություն միասնության հարցը, հատկապես մեր օրերում, երբ այն ունի կարևոր նշանակություն»,- նշել է բանասիրական ֆակուլտետի ՈւԳԸ փոխնախագահ Սոնա Մուսայելյանը՝ հավելելով, որ կարևորում է նման ձևաչափով հանդիպումների անհրաժեշտությունը և առաջիկայում առցանց հանդիպումներ են նախատեսվում նաև ժամանակակից այլ գրողների հետ։
Հարց-պատասխանների, քննարկումների միջոցով ուսանողները հեղինակին հղեցին տարաբնույթ հարցեր նրա ժողովածուներից, մասնավորապես՝ «Արտագաղթած կարոտ», «Հակաքաղաքական», «Զգուշացե՛ք, դռները չեն փակվում» գրքերից, գրական հայացքներից և այլն։
Դավիթ Սամվելյանը ևս իր հերթին շնորհակալություն հայտնեց հրավերի և կայացած առցանց հանդիպման համար։
«Միշտ ցանկանում էին հանդիպել ԱրՊՀ ուսանողության հետ, սակայն ինչ-ինչ պատճառներով չեղարկվում էր։ Մոտ ապագայում պլանավորում եմ լինել Արցախում և անմիջական հանդիպում ունենալ ուսանողության հետ»,- նշել է Դ. Սամվելյանը:
