Այսօր՝ ապրիլի 15-ին, ոչ ֆորմալ կրթության շրջանակում ԱրՊՀ ուսանողության հետ հանդիպում է ունեցել ԱՀ նախագահի աշխատակազմի ղեկավարի առաջին տեղակալ, միջազգային զարգացման մասնագետ Դավիթ Հակոբյանը: Միջոցառմանը ներկա են եղել տարբեր ֆակուլտետներից ուսանողներ: ԱրՊՀ ռեկտոր Ա. Սարգսյանը ներկայացրել է բանախոսին և շնորհակալություն հայտնել ուսանողության հետ հանդիպելու համար:
«Ես հավատում եմ, որ վերականգնվելու ենք: Հայկական աշխարհը գլոբալ է, բոլորս մեկ ամբողջականություն ենք, և պետք է փորձենք բոլորս միասին մասնակցել Արցախը պահպանելուն, հայկական պահելուն և այն զարգացնելուն»,- նշել է Դ. Հակոբյանը:
Բանախոսը պատմել է իր գործունեության և աշխատանքային փորձի մասին, տվել ներկա իրավիճակի հետ կապված իր վերլուծությունը, ներկայացրել երկրի զարգացման մոտ և հեռու ապագայի իր տեսլականը:
Դավիթ Հակոբյանը միջազգային զարգացման մասնագետ է, ունի այդ ոլորտում ավելի քան 30 տարվա աշխատանքային փորձ: Վերջին 26 տարիների ընթացքում աշխատել է Միավորված ազգերի կազմակերպությունում՝ զբաղեցնելով տարբեր բարձրաստիճան պաշտոններ: Մասնավորապես, ի թիվս այլ պաշտոնների՝ վերջին տարիներին նա եղել է Սիրիայում ՄԱԿ-ի զարգացման ծրագրերի մշտական ներկայացուցիչ, իսկ նախքան այդ՝ Աֆղանստանում, Սոմալիում ու Ղրղզստանում՝ մշտական ներկայացուցչի տեղակալ:
Դավիթ Հակոբյանը մի քանի տասնյակ երկրներում ՄԱԿ-ի ծրագրերի շրջանակներում համակարգել և իրականացրել է հումանիտար ու զարգացման մասշտաբային նախագծեր՝ ուղղված այդ պետությունների հումանիտար ճգնաժամերի հաղթահարմանը, կայուն զարգացմանը, քաղաքացիների կյանքի որակի բարելավմանը:
Ուսանողների հետ հանդիպման ընթացքում Դ. Հակոբյանը պատասխանել է ուսանողների հարցերին, որոնք վերաբերում էին երկրի քաղաքական, տնտեսության զարգացման, սոցիալական ծրագրերի իրականացման և այլ ուղղությունների:
