Ապրիլի 20-ին Արցախի պետական համալսարանում կայացել է հանդիպում Արցախի Հանրապետության Ազգային ժողովի նախագահ Արթուր Թովմասյանի հետ, որին ներկա էին դասախոսներ, ուսանողներ և աշխատակիցներ: Հանդիպումը կազմակերպվել է համալսարանում մեկնարկած «Արցախ. ներկան և ապագան» ծրագրի շրջանակներում:
Ողջունելով ներկաներին՝ ԱրՊՀ ռեկտոր Արմեն Սարգսյանը կարևորել է ԱՀ ԱԺ նախագահի հետ նման ձևաչափով հանդիպումը՝ նշելով, որ այդպիսի հանդիպումները լավագույն հարթակ են՝ մտավորականությանն ու երիտասարդությանը հուզող հարցերը բարձրաձայնելու և ոլորտի պատասխանատուից անմիջապես պարզաբանումներ լսելու տեսանկյունից:
«Արթուր Թովմասյանը եղել է ԱրՊՀ շրջանավարտ և երկար տարիներ աշխատել է համալսարանում: Գնահատման արժանի է համալսարանի զարգացման գործում նրա ունեցած ավանդը: Ռեկտորատը որոշել է ԱրՊՀ 50-ամյակի հուշամեդալով պարգևատրել Ա. Թովմասյանին»,- նշել է ԱրՊՀ ռեկտոր Ա. Սարգսյանը՝ ԱԺ նախագահին շնորհելով ԱրՊՀ 50-ամյակի հուշամեդալ:
Արթուր Թովմասյանը կարևորել է համլսարանականների ծավալած կրթադաստիարակչական ու գիտական գործունեությունը՝ ի նպաստ Արցախի ներկայի և ապագայի: Նրա խոսքով՝ Արցախի պետական համալսարանն արդեն իսկ կայացած բուհ է և ունի իր ավանդույթները:
Բանախոսը ներկայացրել է ստեղծված իրավիճակի հետ կապված առկա խնդիրները, արտաքին քաղաքական մարտահրավերները, Արցախի անվտանգության ու կարգավիճակի հետ կապված որոշ մանրամասներ և պարզաբանել դրանց ուղղությամբ տարվող աշխատանքները:
«Օրակարգային բոլոր հարցերը ուշադրության կենտրոնում են, դրանք բարձրաձայնվում են, և ամեն բան արվում է բանակցությունների դաշտում հաջողություններ ունենալու ուղղությամբ»,- նշել է Ա. Թովմասյանը՝ հավելելով, որ միասնական լինելու դեպքում կհասնենք մեր առջև դրված նպատակներին:
Հանդիպման ընթացքում Ա. Թովմասյանը պատասխանել է ներկաների հարցերին, որոնք վերաբերում էին երկրի անվտանգությանը, սոցիալական, տնտեսական, քաղաքական և այլ ոլորտների: