Ապրիլի 22-ին Արցախի պետական համալսարանում կազմակերպվել է օլիմպիադա մաթեմատիկա առարկայից, որը նախաձեռնել էր մաթեմատիկայի ամբիոնի վարիչ, ֆ.մ.գ.թ., դոցենտ Լ. Աբրահամյանը՝ ուսանողների ակտիվ մասնակցությամբ: Օլիմպիադայի առաջին փուլին մասնակցել են տասնյակ աշակերտներ և ուսանողներ: Կազմակերպիչների խոսքով՝ հաջորդ փուլը նախատեսվում է կազմակերպել նոր ուսումնական տարում:
«Օլիմպիադան կազմակերպվել է ֆրանսիացի տաղանդավոր մաթեմատիկոս Էվարիստ Գալուայի 210-ամյակի կապակցությամբ, ով ֆրանսիական գիտության պարծանքն է, որի վաստակը շատերին է ոգեշնչել զբաղվել մաթեմատիկա գիտությամբ»,- նշել է Լ. Աբրահամյանը՝ հավելելով, որ նման միջոցառումները կարևորվում են նրանով, որ բուհ-դպրոց կապն ավելի է ամրապնդվում, և աշակերտների մոտ առարկայի հանդեպ հետաքրքրությունը զարգանում է:
Նախքան օլիմպիադան սկսելը՝ ուսանողները մասնակիցներին ներկայացրել են հանրահայտ մաթեմատիկոսի կյանքն ու գիտական հաջողությունները:
Օլիմպիադայի արդյունքները ամփոփելուց հետո առաջնակարգ տեղեր զբաղեցրած մասնակիցները կարժանանան պատվոգրերի: