ԱրՊՀ բանասիրական ֆակուլտետի ուսանողական խորհրդի նախաձեռնությամբ կազմակերպվել է «Ստեղծագործ ուսանող» խորագրով միջոցառում, որին մասնակցել են ֆակուլտետի տարբեր մասնագիտություններից ուսանողներ: Միջոցառման ընթացքում ուսանողները ներկայացրել են իրենց հեղինակային արձակ և չափածո ստեղծագործությունները՝ հայրենասիրական, պատերազմական, կարոտի և սիրո թեմաներով գրված:
Միջոցառմանը ներկա էին գրականության և լրագրության ամբիոնի դասախոսներ, ովքեր իրենց ելույթներում գոհունակություն են հայտնել ուսանողների ներկայացրած գործերի վերաբերյալ, խորհուրդներով ուղղորդել և ոգևորել երիտասարդ ստեղծագործողներին:
«Ասպարեզ է իջել մի սերունդ, որը գալիս է ոչ թե գրերից, բանաստեղծություններից, այլ այսօրվա դժվարին, ողբերգական վիճակից»,-նշել է ամբիոնի դասախոս, բ.գ.դ, պրոֆեսոր, բանաստեղծ Ս. Խանյանը՝ հավելելով, որ հիացած է ուսանողների ստեղծագործական ձիրքով և խոստանում է իր առաջիկա գրքում տպագրել հնչած լավագույն ստեղծագործությունները:
«Միջոցառման նպատակը ստեղծագործող ուսանողներին բացահայտելն ու ներկայացնելն էր: Սա ևս մի առիթ էր՝ ծանոթանալու նրանց ներաշխարհին և հույզերին, հնարավորություն տալու ինքնադրսևորվելու և ոլորտի ավագ սերնդի ներկայացուցիչներից խորհուրդներ ստանալու համար»,- նշել է ֆակուլտետի ՈՒԽ նախագահ Ի. Առուստամյանը:
Ստեղծագործող ուսանողները ևս գոհունակություն են հայտնել միջոցառման ձևաչափից՝ այն համարելով ոգեշնչման ազդակ:
«Ինձ համար պոեզիան հանգստանալու, ինքնամխիթարանքի միջոոց է։ Շնորհակալություն այսպիսի միջոցառում կազմակերպելու, ստեղծագործող ուսանողներին ինքնադրսևորվելու հնարավորություն ընձեռելու համար»,-նշել է ուսանողուհի Լուսինե Սաիլյանը:
Միջոցառման ընթացքում ուսանողների կողմից հնչել է նաև ասմունք հայ դասականների գործերից: