Ապրիլի 23-ին Արցախի պետական համալսարանի պատմության և իրավագիտության ֆակուլտետի ուսանողական խորհրդի նախաձեռնությամբ Հայոց ցեղասպանության 106-րդ տարելիցի կապակցությամբ Ստեփանակերտի Ա. Ղուլյանի անվան N2 դպրոցի 8-րդ դասարանի աշակերտների հետ կազմակերպվել է դաս-սեմինար՝ «Հայոց ցեղասպանության պատմական և իրավական կողմերը» թեմայով:
Նախաձեռնության մասնակից են դարձել «Իրավագիտություն» և «Պատմություն» մասնագիտություններից ուսանողներ, ովքեր հանդես են եկել ելույթներով՝ Հայկական հարցի, Հայոց ցեղասպանության, դրանց իրավական ու պատմական կողմերի և արդիականացման վերաբերյալ:
«Իրավագիտություն» մասնագիտության առաջին կուրսի ուսանող Արա Սարգսյանի խոսքով՝ Թուրքիան իր ցեղասպան քաղաքականությունը շարունակում է նաև այսօր՝ Ադրբեջանի ձեռքով, որի վառ ապացույցը եղավ 2020 թ. Արցախյան պատերազմը:
«Ի՞նչ խոսք կարող է լինել խաղաղասիրության մասին, եթե Բաքվում բացվել է ռազմավարի պուրակ, որն ակնհայտ հաստատում է Ադրբեջանում հայատյացության և թշնամանքի քարոզի պետական քաղաքականության առկայության փաստը: Այդ քաղաքականությունը հետևողականորեն իրականացվում է տարիներ շարունակ և հաստատվում կոնկրետ ապացույցներով»,-իր խոսքում նշել է Ա. Սարգսյանը՝ հավելելով, որ ցեղասպանությունը, ըստ միջազգային իրավունքի, հանցագործություն է, և այն անհրաժեշտ է կանխարգելել ու դատապարտել:
«Պատմություն» մասնագիտության 2-րդ կուրսի ուսանողուհի Տաթև Սարգսյանը աշակերտներին ներկայացրել է հայկական հարցի ու դրա ձևավորման արմատների մասին փաստեր և մանրամասներ:
Ուսանողները պատասխանել են նաև աշակերտների հարցերին:
