Արցախի պետական համալսարանի պատմության և իրավագիտության ֆակուլտետում կայացել է «Հայոց ցեղասպանությունը երեկ և այսօր» թեմայով կլոր սեղան-քննարկում ՝ նվիրված ցեղասպանության 106-րդ տարելիցին: Միջոցառումը կազմակերպվել է պատմության և քաղաքագիտության ամբիոնի վարիչ, պ.գ.թ., դոցենտ Նունե Սարումյանի նախաձեռնությամբ, որին ներկա էին գիտական և միջազգային համագործակցության գծով պրոռեկտոր Վ. Ավանեսյանը, ֆակուլտետի դեկան Ա. Խաչատրյանը, ամբիոնից դասախոսներ և տարբեր կուրսերից ուսանողներ:
«Իմ մոտեցումն այնպիսին է, որ մենք ոչ թե պետք է ողբալի իրավիճակում մեզ ներկայացնենք, այլ՝ ցույց տանք աշխարհին, որ մեր նկատմամբ ոճրագործութուն է կիրառվել, և մենք չենք համաձայնվում այդ գործողությունների հետ՝ մեր բողոքի ձայնը բարձրացնելով, դատապարտելով և պահանջատեր լինելով մեր տարածքների, մեր հոգևոր-մշակութային կոթողների նկատմամբ, որոնք հայկական են և մեր ազգայինն են: Յուրաքանչյուր ոճրագործություն անկախ ժամկետից պետք է դատապարտվի և պետք է դրա համար փոխհատուցվի»,- նշել է պ.գ.թ., դոցենտ Ն. Սարումյանը՝ հավելելով, որ ինչքան երկարաձգվում է ցեղասպանության ճանաչման գործընթացը և ամրապնդվում ժխտողական քաղաքականությունը, այնքան նորանոր ոճրագործություններ են տեղի ունենում:
Պատմության և իրավագիտության ֆակուլտետի դեկան, պ.գ.թ., դոցենտ Ա. Խաչատրյանը նշել է, որ հայ ժողովուրդը հարուստ պատմություն ունի, որով պետք է հպարտանա և առաջ շարժվի:
«Թուրքիայի որդեգրած ծավալապաշտական, ազգայնամոլական, ինչու չէ նաև հետադիմական գաղափարախոսության՝ պանթուրքիզմի արդյունքը եղավ հայ ժողովրդի հանդեպ իրականացրած ցեղասպանությունը: Ինչքան էլ այսօր փորձում է իրեն դրսևորել որպես ժողովրդավարական երկիր, այնուհանդերձ պանթուրքիզմը նրա արտաքին քաղաքականության գլխավոր ուղենիշն է, որի ապացույցը եղավ նաև 20-րդ դարասկզբին Կովկասում ստեղծված անարմատ ու արհեստածին այդ պետությունը՝ Ադրբեջանը»,- իր խոսքում նշել է Ա. Խաչատրյանը և հավելել, որ մենք մի այնպիսի միասնական ազգ ենք, որը պետք է ապրի, ստեղծի, շենացնի և նորը կերտի:
Քննարկման մասնակիցները հանդես են եկել ելույթներով և զեկույցներով, որոնք վերաբերում էին մշակութային եղեռնին՝ որպես Թուրքիայում և Ադրբեջանում ցեղասպանության քաղաքականության շարունակություն, անդրադարձել ցեղասպանության դատապարտման իրավական կողմերին, պահանջատիրությանը, միջազգային ճանաչման գործընթացին և արդի փուլի իրավական մարտահրավերներին:
«Ցեղասպանության կրկնության հավանականությունը մեր օրերում շատ ավելի մեծ է, քանի դեռ միջազգային հանրությունը անտարբեր է մնում այդ խնդրի նկատմամբ: Մեր գերխնդիրը մեկն է. հասնել ճշմարտության և արդարության, որովհետև այդ երկուսն էլ մարդու կյանքի և հայրենիքի կարևորագույն իրավունքների առանցքային կետերն են»,- նշել է «Հայոց պատմություն» մասնագիտության մագիստրատուրայի 2-րդ կուրսի ուսանողուհի Մարինե Հովակիմյանը: