Ապրիլի 27-ին Արցախի պետական համալսարանում ամփոփվել են մաթեմատիկա առարկայից կազմակերպված օլիմպիադայի արդյունքները: Օլիմպիադայում հաղթող ճանաչված և մասնակից բոլոր աշակերտներն ու ուսանողները արժանացել են գովասանագրերի:
Բնագիտական ֆակուլտետի դեկան, ք.գ.թ., պրոֆեսորի պաշտոնակատար Վ. Միրզոյանը ողջունել է օլիմպիադայի մասնակիցներին և ուսուցիչներին՝ նշելով, որ, ըստ ամփոփված արդյունքների, մասնակիցների մեջ կան փայլուն գիտելիքներ ունեցող ուսանողներ և աշակերտներ:
«Օլիմպիադայի հիմնական նպատակն էր ընտրել մասնակիցների, ովքեր հետագայում պետք է նաև մայր բուհում շարունակեն ուսումը, խորացնեն իրենց գիտելիքներն այդ մասնագիտությամբ և համալրեն մեր շարքերը»,- իր խոսքում նշել է Վ.Միրզոյանը՝ շնորհակալություն հայտնելով նաև մասնակից դպրոցների ուսուցչական կոլեկտիվներին՝ օլիմպիադային տրամաբանող և խելացի աշակերտներ ընդգրկելու համար:
Ուսումնական աշխատանքների գծով պրոռեկտոր, ֆ.մ.գ.թ., դոցենտ Գ. Սահակյանը իր հերթին շնորհավորել է բոլորին և հաղթող մասնակիցներին պարգևատրել նաև գրքերով:
«Արցախի պետական համալսարանը բուհ-դպրոց համագործակցության շրջանակներում մշտապես հանդես է եկել նման նախաձեռնություններով՝ նպատակ հետապնդելով զարգացնելու աշակերտների հետաքրքրությունը ֆիզմաթ գիտությունների հանդեպ»,- նշել է Գ.Սահակյանը:
Օլիմպիադայի այն մասնակիցները, ովքեր ցանկություն ունեն ձեռք բերել առաջադրված խնդիրների լուծումները, անձնական նամակով կարող են գրել մեր ֆեյսբուքյան էջին՝ տրամադրելով իրենց էլեկտրոնային հասցեները:
