Ապրիլի 29-ին Արցախի պետական համալսարանում հանդիպում է կայացել «Արցախի բնակավայրերը» գրքի հեղինակ Սլավա Սարգսյանի հետ: Հանդիպումը կազմակերպվել է բանասիրական ֆակուլտետի դեկան, բ.գ.թ., դոցենտ Լուսինե Մարգարյանի նախաձեռնությամբ՝ «Հայոց լեզվի պատմություն և գրաքննադատություն» մասնագիտության մագիստրատուրայի առաջին կուրսի ուսումնական պլանում ներառված «Արցախի տեղանվանագիտություն» առարկայի շրջանակներում: Միջոցառմանը ներկա էին համալսարանի ռեկտոր Ա. Սարգսյանը, համալսարանի պրոֆեսորադասախոսական կազմից ներկայացուցիչներ և տարբեր կուրսերից ուսանողներ:
Միջոցառման մասնակից ուսանողները հանդես են եկել ելույթներով՝ գնահատելով ուսումնասիրությունը համաժամանակյա, տարժամանակյա կտրվածքով՝ ներկայացնելով բնակավայրերի ստուգաբանական առանցքը:
Ներկաների խոսքով՝ գիրքը որպես համահավաք աշխատություն, լեզվաբանական, պատմական և աշխարհագրական ուսումնասիրությունների մի փունջ-ուղեցույց է ոչ միայն սկսնակ տեղանվանագետների, այլ նաև տեղանվանագիտությամբ և Արցախի պատմությամբ հետաքրքրվող անձանց համար:
«Սլավա Սարգսյանի կատարած ուսումնասիրությունը միարար գիծ է՝ անցյալի ստեղծածի, վկայածի ու պեղածի և ապագային ուղղված հայացքի հորիզոնում: Այն մեզ կուղղորդի դեպի ինքնաճանաչություն, որովհետև մեր իսկ ճանաչությունն սկսվում է մեր բնակության տարածքի ճանաչությունից»,- իր ելույթում նշել է «Հայոց լեզվի պատմություն և գրաքննադատություն» մասնագիտության մագիստրատուրայի առաջին կուրսի ուսանողուհի Հերմինե Արզումանյանը՝ հավելելով, որ «Արցախի բնակավայրերը» գիրքը նաև մշտապես նորացվող աշխարհի հետ հարաբերվելու, քաղաքակրթությունները ճանաչելու կարևոր միջոց է:
Դասախոսական կազմից ելույթներով հանդես են եկել բ.գ.թ., դոցենտի պաշտոնակատար Ս. Մինասյանը, բ.գ.թ., դոցենտ Շ.Սաղյանը և պատմության ու քաղաքագիտության ամբիոնի ավագ դասախոս Լ. Հովհաննիսյանը:
Սլավա Սարգսյանը իր շնորհակալությունն է հայտնել հրավերի և միջոցառման կազմակերպման համար՝ նշելով, որ կարևորում է նաև ներկաների կողմից գրքի վերաբերյալ կատարած վերլուծությունները:
«Քաղաքական նկատառումներից ելնելով՝ առաջիկայում նախատեսում եմ նաև հրատարակել Արցախի վանքերի և հուշարձանների մասին աշխատություն և թարգմանել այն տարբեր լեզուներով: «Արցախի բնակավայրերը» ևս կթարգմանվի տարբեր լեզուներով ՝ մի շարք պատմական փաստեր վերհանելու և աշխարհին ի ցույց դնելու համար»,- նշել է հեղինակը:
Միջոցառման ավարտին ռեկտորը բանախոսին շնորհակալություն է հայտնել Արցախի պետական համալսարանում հյուրընկալվելու համար և պարգևատրել «Արցախի ժողովրդագիտությունը» գրքի հատորներով: Բանախոսն իր հերթին համալսարանին է նվիրել իր հեղինակային գրքերից:
Հանդիպման ընթացքում Ս. Սարգսյանը պատասխանել է նաև ներկաների հարցերին:
