Ապրիլի 30-ին Արցախի պետական համալսարանի մանկավարժության և հոգեբանության ամբիոնի և հոգեբանական կենտրոնի համատեղ նախաձեռնությամբ կազմակերպվել է կլոր սեղան-քննարկում՝ «Ցեղասպանության թեման կրթության ոլորտի համատեքստում» թեմայով: Քննարկմանը ներկա էին մանկավարժության և սպորտի ֆակուլտետի դեկան Շ.Այդինյանը, մանկավարժության և հոգեբանության ամբիոնի վարիչ Է.Բաղդասարյանը, ամբիոնից դասախոսներ և հոգեբանական կենտրոնից մասնագետներ:
Կարևորելով թեմայի ճիշտ մատուցումը դասապրոցեսին՝ դասախոսները քննարկում են վարել ցեղասպանության թեման սերունդներին փոխանցելու հարցի շուրջ, ներկայացրել իրենց անձնական մոտեցումները, թե երբ և ինչպես պետք է երեխաներին պատմել ցեղասպանության մասին, հոգեբանական ինչ հետևանքներ կարող է թողնել, ինչպես պետք է ազատվել զոհի հոգեբանական ենթագիտակցական կարծրատիպից և ինչ ազդեցություն է ունենում ցեղասպանության ժխտումը հասարակական առողջության վրա:
Քննարկվող հարցի շուրջ իրենց տեսակետներն են ներկայացրել ֆակուլկտետի դեկան Շ.Այդինյանը, մ.գ.թ., դոցենտ Է.Բաղդասարյանը, հ.գ.թ., պրոֆեսորի պաշտոնակատար Ա.Մխիթարյանը և ամբիոնից այլ դասախոսներ: Արդյունքում ներկաները եկել են այն եզրակացության, որ ցեղասպանության թեմայի սխալ մատուցման դեպքում կարող է առաջանալ զոհի բարդույթ, ընկալման, ըմբռնման հետ կապված դժվարություններ, դեռահասության շրջանում ագրեսիվություն, պետք է համարձակ լինել և երեխաներին բացատրել իրողությունները, ճշմարտությունը՝ վերացնելով նրանց մոտ ձևավորված զոհի կարգավիճակը: