Մայիսի 6-ին Արցախի պետական համալսարանի կենսաբանության և քիմիայի ամբիոնի նախաձեռնությամբ տեղի է ունեցել օլիմպիադա «Կենսաբանություն» և «Քիմիա» առարկաներից, որին մասնակցել է հանրապետության 15 դպրոցների 9-12-րդ դասարանների 40 աշակերտ:
Ամփոփելով օլիմպիադայի արդյունքները՝ «Քիմիա» առարկայից առաջին տեղ են գրավել Սարուշենի միջնակարգ դպրոցի աշակերտ Բենիամին Հայրապետյանը և Ստեփանակերտի ֆիզմաթ դպրոցի աշակերտուհի Աստղիկ Հակոբյանը, 2-րդ տեղ՝ Սոսի միջնակարգ դպրոցի աշակերտուհի Նարե Դադասյանը և Ստեփանակերտի ֆիզմաթ դպրոցի աշակերտուհի Վարդուհի Առուշանյանը, 3-րդ տեղ՝ Աշանի միջնակարգ դպրոցի աշակերտուհի Անի Մովսիսյանը և Ստեփանակերտի ֆիզմաթ դպրոցի աշակերտուհի Ստելլա Գրիգորյանը:
«Կենսաբանություն» առարկայից մրցանակային առաջին տեղ են զբաղեցրել Հաթերքի միջնակարգ դպրոցի աշակերտուհի Մելինե Իսկանդարյանը և Մարտունու Ն. Ստեփանյանի անվան հ.1 մ/հ դպրոցի աշակերտ Գևորգ Ավանեսյանը, 2-րդ տեղ՝ Սոսի միջնակարգ դպրոցի աշակերտուհի Նարե Դադասյանը և Ճարտարի միջնակարգ դպրոցի աշակերտուհի Լիլիա Օհանյանը, 3-րդ տեղ՝ Ստեփանակերտի Ե. Չարենցի անվան 7-րդ դպրոցի աշակերտուհի Աննա Պետրոսյանը և Ստեփանակերտի Վ. Ջհանգիրյանի անվան 11-րդ ավագ դպրոցի աշակերտուհի Էլինա Ղուկասյանը:
Մրցանակային տեղեր զբաղեցրած մասնակիցները պարգևատրվել են պատվոգրերով և գրքերով:
Բնագիտական ֆակուլտետի դեկան Վ.Միրզոյանը, շնորհավորելով մրցանակակիրներին, կարևորել է օլիմպիադայի նշանակությունը՝ նշելով.
«ԱրՊՀ զարգացման ռազմավարական ծրագրում առանցքային տեղ է գրավում բուհ-դպրոց կապը: Այս օլիմպիադան կարևոր է բուհ-դպրոց կապի ամրապնդման և ապագա դիմորդների շրջանում բնագիտական առարկաների նկատմամբ սեր ու հետաքրքրություն առաջացնելու տեսանկյունից»: