Մայիսի 13-ին հրավիրվել է բանասիրական ֆակուլտետի մեծ խորհրդի նիստ, որի ընթացքում բանասիրական ֆակուլտետի դեկան, բ.գ.թ., դոցենտ Լուսինե Մարգարյանը ներկայացրել է 2019-2020 ուսումնական տարում ֆակուլտետի կատարած աշխատանքների մասին հաշվետվությունը, և տեղի է ունեցել ԱրՊՀ 50-ամյակի հուշամեդալով պարգևատրության արարողություն:
Դեկան Լ. Մարգարյանը ներկայացրել է հաշվետու տարում ֆակուլտետի կառուցվածքը և նրա կառավարման համակարգը, կրթական գործունեության կազմակերպումը, ուսումնամեթոդական գործունեությունը, ուսանողների կատարած գիտական աշխատանքը, դաստիարակչական ու կրթական ժամանցը, համագործակցությունը և ինքնավերլուծությունը՝ ուժեղ ու թույլ կողմերով:
2019-2020 ուսումնական տարում ֆակուլտետում ուսումնագիտական գործունեությունն իրականացվել է 4 ամբիոններում ՝ Ակ. Ս. Աբրահամյանի անվան հայոց լեզվի, ռոմանագերմանական լեզուների, գրականության և լրագրության, ռուսաց լեզվի և գրականության: Ֆակուլտետի 2019-2020 ուստարվա ուսումնական ծանրաբեռնվածությունը կազմել էր 43595 ակադեմիական ժամ, որը բաշխվել էր 4 ամբիոնների միջև:
Ուսումնամեթոդական գործունեությունը բնութագրելով՝ Լ. Մարգարյանը նշել է. «Հաշվետու տարին կարող ենք բնութագրել կրթության որակի բարելավմանն ուղղված աշխատանքների համակարգման տարի՝ մեկնարկին, իսկ երկրորդ կիսամյակից՝ նոր մարտահրավերին՝ համավարակին, արագ արձագանքելու և ուսուցման գործընթացը հնարավորինս լիարժեք կազմակերպելու հնարավորությունների համակարգման ժամանակահատված: Երկրորդ կիսամյակում շրջվեց ուսումնական գործընթացը, և ստիպված էինք հեռավար կարգով ուսուցումը կազմակերպելու: Այն հնարավորինս լիարժեք իրականացնելու հնարավորություն ունեցանք՝ շնորհիվ ռեկտորատի կողմից մեկշաբաթյա պարբերականությամբ, ըստ խնդիրների, ընդունվող որոշումների: Ինչպես բուհի բոլոր ստորաբաժանումները, նաև բանասիրականն ուներ իր դասախոսական անձնակազմի կողմից կազմված էլեկտրոնային դասախոսությունների բանկը և բոլոր դասընթացների առարկայական նկարագրերը»:
Դեկանը ներկայացրել է նաև կադրային ներուժի զարգացման ուղղությամբ արձանագրված ձեռքբերումները, տարվա ընթացքում իրականացված բազմաբնույթ այն միջոցառումները, որոնք միտված են եղել կրթադաստիարակչական, գիտահետազոտական, ուսումնական գործընթացի բարելավմանը, միջբուհական, բուհ-դպրոց կապերի ամրապնդմանը, հասարակությանը կրթագիտական արժեքներ փոխանցելուն և այլ առանցքային ոլորտների:
Լ. Մարգարյանը որպես ինքնավերլուծության ուժեղ կողմեր առանձնացրել է ֆակուլտետում լիարժեք ներդրված էլեկտրոնային ուսուցման հարթակը և այդ ռեսուրսներից օգտվելու ունակ պրոֆեսորադասախոսական, վարչական և ուսանողական համակազմ ունենալը, հետևողականորեն իրականացվող աշխատանքները` ուղղված ուսանողների իրազեկվածության մակարդակի բարձրացմանը, ֆակուլտետի բոլոր ամբիոններում մասնագիտական կրթական ծրագրերը մշակված ու ներդրված լինելու փաստը, համաչափ զարգացման ու լավ փորձի տարածման հարթակի ստեղծված լինելը: Խոսելով թույլ կողմերի մասին՝ ընդգծել է միջամբիոնային փոխգործակցության ակտիվացման անհրաժեշտությունը և օտար լեզվով դասընթացների թվի աճի ապահովումը այլ կրթական ծրագրերի շրջանակներում:
Հաշվետվության շուրջ ելույթներ են ունեցել ԱրՊՀ ուսումնական աշխատանքների գծով պրոռեկտոր Գ. Սահակյանը, դասախոսներ Ս. Խանյանը, Զ. Բալայանը, Ռ. Պետրոսյանը, ովքեր բարձր են գնահատել 2019-2020 ուստարում ֆակուլտետի կատարած աշխատանքը: Հաշվետվությունը գնահատվել է բավարար:
Ռեկտոր Արմեն Սարգսյանը շնորհակալություն է հայտնել ֆակուլտետի համակազմին ու դեկան Լ. Մարգարյանին՝ արդյունավետ իրականացրած աշխատանքի համար և ԱրՊՀ 50-ամյակի հուշամեդալով պարգևատրել ֆակուլտետի աշխատանքներում ակտիվություն ցուցաբերած, համալսարանի զարգացման գործում ավանդ ունեցած դասախոսների և աշխատակիցների:
