Մայիսի 20-ին Արցախի պետական համալսարանի պատմության և իրավագիտության ֆակուլտետի իրավունքի ամբիոնի վարիչ, ի.գ.թ., դոցենտի պաշտոնակատար Գրետա Արզումանյանի նախաձեռնությամբ և Փաստաբանական պալատի անդամ, փաստաբան, իրավունքի ամբիոնի դասախոս Ռոման Երիցյանի համակարգմամբ կազմակերպվել է «Զրպարտությունը և վիրավորանքը» թեմայով դատախաղ: Դատախաղը անց է կացվել «Իրավագիտություն» մասնագիտության 3-րդ կուրսի ուսումնական պլանում ներառված «Քաղաքացիական դատավարություն» դասընթացի շրջանակներում: Միջոցառմանը ներկա էին ԱրՊՀ ռեկտոր Ա. Սարգսյանը, ԱՀ դատական համակարգի, դատախազության, Փաստաբանական պալատի ներկայացուցիչներ, իրավունքի ամբիոնից դասախոսներ և ուսանողներ:
Միջոցառման ընթացքում ուսանողներն ուսումնական նյութի շրջանակում ստացած իրենց տեսական գիտելիքները կիրառեցին գործնականում:
Ռեկտոր Արմեն Սարգսյանը, կարևորելով դատախաղի կազմակերպման անհրաժեշտությունը, նշել է, որ դատավարության համար ընտրված թեման արդիական ու պահանջված է: Շնորհակալություն հայտնելով դատախաղի մասնակից ուսանողներին ու կազմակերպիչներին՝ ռեկտորն առաջարկել է առաջիկայում կայանալիք ուսանողական համագումարում դատախաղին մասնակցած ուսանողներին արժանացնել խրախուսանքի:
«Կայացած դատախաղը դատավարության բնագավառում ուսանողների ստացած գիտելիքների ամփոփումն էր: Հաշվի առնելով գործի բարդությունը՝ կարծում եմ ուսանողներն այսօր իրենց ցուցաբերեցին դրական հատկանիշներով»,- նշել է իրավունքի ամբիոնի վարիչ Գ.Արզումանյանը՝ հավելելով, որ կայացած դատավարությունը ուսանողներին հնարավորություն տվեց հմտանալու մասնագիտական ոլորտում և փորձ ձեռք բերելու հետագա գործունեության ծավալման ուղղությամբ:
Դատավարության համակարգող Ռ. Երիցյանի խոսքով նման միջոցառումների առանցքային նպատակն է ուսանողներին, բացի տեսական գիտելիքներից, ծանոթացնել նաև պրակտիկ աշխատանքին:
«Իրավաբանի մասնագիտությունը, հատկապես մեր օրերում, շատ եմ կարևորում և դատավարության կազմակերպման ընթացքում ուսանողների շրջանում արդեն իսկ նկատել եմ ապագա լավ մասնագետների»,- իր խոսքում նշել է Ռ. Երիցյանը:
Դատախաղին հրավիրված իրավական ոլորտի պատասխանատուներ Ն. Նարիմանյանը, Գ. Գրիգորյանը, Ա. Թադևոսյանը, Ա. Ապրեսյանը և ԱրՊՀ էթիկայի հանձնաժողովի նախագահ Շ. Այդինյանը, կարևորելով թեմայի արդիականությունը և դատախաղի նշանակությունը, գոհունակություն են հայտնել դատախաղի ընթացքում ուսանողների ցուցաբերած գիտելիքներից, գործնական կարողություններից և շնորհակալություն հայտնել միջոցառման մասնակից ուսանողներին ու կազմակերպիչ դասախոսներին: