Հոկտեմբերի 27-ին ԱրՊՀ է այցելել հայազգի անվանի գիտնական, տեխնիկական և ֆիզիկամաթեմատիկական գիտությունների դոկտոր, պրոֆեսոր Արտեմ Օհանովը, ով աշխարհին առավել հայտնի է նոր նյութերի համակարգչային դիզայնի մեթոդների և բյուրեղային կառուցվածքների ստեղծման ու գիտության հանրայնացման աշխատանքներով։
Անվանի գիտնականին նախ ընդունել է ԱրՊՀ ռեկտոր Արմեն Սարգսյանը: Ողջունելով հյուրին՝ ռեկտոր Ա. Սարգսյանը շնորհակալություն է հայտնել Ա. Օհանովին Արցախի պետական համալսարան այցելելու համար՝ բարձր գնահատելով նրա ներդրումը գիտության ոլորտում: Հանդիպման ընթացքում քննարկվել են բարձրագույն կրթության բնագավառում բնագիտական ուղղության մասնագիտությունների զարգացմանը վերաբերող հարցեր:
«Մեզ համար մեծ պատիվ է մեր համալսարանում հյուրընկալել աշխարհահռչակ այնպիսի գիտնականի, ինչպիսին Արտեմ Օհանովն է»,-նշել է Ա. Սարգսյանը:
Արտեմ Օհանովն իր հերթին պատրաստակամություն է հայտնել մասնագիտական աջակցություն ցուցաբերելու ԱրՊՀ-ին:
Ռեկտորի հետ հանդիպումից հետո գիտնականը ԱրՊՀ բնագիտական ֆակուլտետի ուսանողների և դասախոսների համար հանդես է եկել «21-րդ դարի մարտահրավերները բյուրեղագիտության ոլորտում» թեմայով դասախոսությամբ:
