Հունվարի 28-ին Արցախի պետական համալսարանում պատմության և իրավագիտության ֆակուլտետի պատմության և քաղաքագիտության ամբիոնի նախաձեռնությամբ տեղի է ունեցել օլիմպիադա «Հայոց պատմություն» առարկայից: Օլիմպիադային մասնակցել են հանրապետության տարբեր համայնքների հանրակրթական դպրոցների 9-12-րդ դասարանների վեց տասնյակից ավելի աշակերտներ:
Օլիմպիադայի նախաձեռնող, պատմության և քաղաքագիտության ամբիոնի վարիչ, պ.գ.թ., դոցենտ Նունե Սարումյանը, ողջունելով մասնակիցներին, շնորհավորել է Հայոց բանակի օրվա առթիվ՝ խորհրդանշական համարելով հենց այդ օրը «Հայոց պատմություն»-ից օլիմպիադա կազմակերպելը:
«Հայոց պատմությունն ուսումնասիրելն ու իմանալը բոլոր ժամանակներում էլ կարևոր է, կարևոր է հատկապես անցյալի սխալներից դասեր քաղելու, սխալները շտկելու և ներկան ու ապագան ճիշտ կառուցելու առումով»,-ասել է Ն. Սարումյանը և կարևորել պատմաբանի մասնագիտությունը մեր օրերում սերունդների մեջ ազգային արժեհամակարգի ձևավորման ու ամրապնդման, ամենաբարդ ժամանակաշրջաններում անգամ ազգային ինքնության պահպանման տեսանկյունից:
Նրա խոսքով՝ օլիմպիադայի հրավերը լայն արձագանք է գտել դպրոցականների և ուսուցիչների շրջանում, ինչն էլ փաստում է, որ հայոց պատմության հանդեպ սերն ու հետաքրքրությունը կենսունակ է՝ թեպետ քաղաքական վերջին զարգացումները փոքր-ինչ ազդել են մասնագիտության հեղինակությանը, ինչն էլ բացասաբար է անդրադարձել «Պատմություն» մասնագիտության այս տարվա դիմորդների թվի վրա: Սակայն, Ն. Սարումյանի խոսքով, բուհ-դպրոց համագործակցության ակտիվացման, հայոց պատմություն առարկայի հանդեպ սեր և հետաքրքրություն առաջացնող համատեղ միջոցառումների արդյունքում կապահովվի արդյունավետություն առկա խնդիրների լուծման ուղղությամբ:
Օլիմպիադան անց է կացվում թեստային եղանակով: Առաջադրված հարցերին պատասխանելու համար աշակերտներին կտրվի երեք ժամ, արդյունքները կամփոփվեն ԱրՊՀ պատմության և քաղաքագիտության ամբիոնի պատմաբաններից կազմված հանձնաժողովի կողմից: Մրցանակային տեղեր զբաղեցրած աշակերտները կպարգևատրվեն պատվոգրերով և արժեքավոր գրքերով:
