Փետրվարի 24-ին ԱրՊՀ բանասիրական ֆակուլտետի ռուսաց լեզվի և գրականության ամբիոնի նախաձեռնությամբ կազմակերպվել է «Ռուսաց լեզվի դասավանդման առանձնահատկությունները բուհում» թեմայով կլոր սեղան-քննարկում, որին հրավիրված էին ԱրՊՀ, Մեսրոպ Մաշտոց և Գրիգոր Նարեկացի համալսարաններում ռուսաց լեզու դասավանդող մասնագետներ:
Ողջունելով քննարկման մասնակիցներին՝ ռուսաց լեզվի և գրականության ամբիոնի վարիչ, մ.գ.թ., դոցենտ Ինգա Հակոբյանը հանդես է եկել դասախոսությամբ՝ կարևորելով ռուսերենի դերն ու նշանակությունը, դասավանդման մեթոդների արդիականացման անհրաժեշտությունը:
Մասնագետները քննարկել են հարցեր, որոնք վերաբերում էին ուսանողների մասնագիտական պատրաստվածության աստիճանի բարձրացմանը, տարբեր ֆակուլտետներում մասնագիտական կողմնորոշմամբ պայմանավորված լեզվամշակութային ասպեկտավորված դասավանդմանը:
Քննարկման արդյունքում դասախոսները եզրահանգել են, որ անհրաժեշտ է բոլոր ֆակուլտետներում ավելացնել ռուսերենի դասավանդմանը հատկացվող ժամաքանակը, որպեսզի հնարավոր լինի պատրաստել ռուսերենի բարձր իմացությամբ մասնագետներ՝ բոլոր մասնագիտությունների գծով:
«Ռուսաց լեզու և գրականություն» կրթական ծրագիրը բանասիրական ֆակուլտետի ռազմավարության իրացման կարևոր ծրագրերից մեկն է և լիովին համապատասխանում է ԱրՊՀ առաքելությանը: Լինելով ԱրՊՀ առաջնային մասնագիտություններից՝ այն մասնագիտական բարձր պատրաստականությամբ մասնագետների պատրաստմամբ նպաստել է մասնագիտության դրական վարկանիշի ձևավորմանը և ապահովել այդ վարկանիշի պահպանման շարունակականությունը մինչ այսօր:
ԱրՊՀ բանասիրական ֆակուլտետի «Ռուսաց լեզու և գրականություն» մասնագիտությունը սպասարկող ամբիոնն ունի գիտամեթոդական անհրաժեշտ որակներ ունեցող դասախոսական կազմ՝ բանասիրական գիտությունների թեկնածուներ, մանկավարժական գիտությունների թեկնածուներ, ամբիոնի դասախոսական կազմի 50 տոկոսն ունի գիտական աստիճան:
