Ուսանողության միջազգային օրվա կապակցությամբ նոյեմբերի 15-ին ԱրՊՀ ռեկտոր Մանուշ Մինասյանը պարգևատրել է մի խումբ ուսանողների:
Մ. Մինասյանը շնորհավորել է ուսանողներին տոնի կապակցությամբ, կոչ արել ուսումնառության նկատմամբ ցուցաբերել լրջագույն վերաբերմունք, միաժամանակ ակտիվ մասնակցություն ունենալ հասարակական կյանքում:
Ֆակուլտետների գործունեության մեջ աչքի ընկնող ուսանողները խրախուսվել են դրամական պարգևով՝ բազային կրթաթոշակի կրկնապատիկի չափով և մասնագիտական արժեքավոր գրքերով:
Անդրադառնալով ապրիլյան քառօրյային՝ ռեկտորը իր գոհունակությունն ու երախտագիտությունն է հայտնել տղա ուսանողներին սահմանադրական և բարոյական իրենց պարտքը կատարելու, իսկ աղջիկներին թիկունքում հանրօգուտ աշխատանքների կազմակերպման համար: Մ. Մինասյանը հավաստիացրել է, որ ապրիլյան մարտական գործողություններին մասնակցելու կապակցությամբ ուսումնական գործընթացում գրանցված բացթողումների պատճառով անվճար համակարգից վճարովի համակարգ տեղափոխված ուսանողներն օգտվելու են ուսման վարձի զեղչից՝ 50%-ի չափով:
Պարգևատրման արարողությանը հաջորդել է քննարկում, որի ընթացքում ուսանողները բարձրացրել են ուսումնական գործընթացում և ուսանողական առօրյայում հանդիպող մի շարք խնդիրներ:
