Սիրելի ուսանողներ, ջերմորեն շնորհավորում եմ ձեր տոնը և հաջողություններ մաղթում ուսման ասպարեզում:
Ուսանողների միջազգային օրը լավագույն առիթն է արժևորելու մեր երիտասարդության սերուցքի դերն ու նշանակությունը երկրի կառուցման, շենացման և անվտանգության պահպանության գործում:
Արցախի ժողովուրդը կրկին փորձության ենթարկվեց ընթացիկ տարվա ապրիլին: Մեր գլխավոր ձեռքբերումը այդ դժնդակ օրերին համայն հայության միասնությունն էր, մեր երիտասարդության պատրաստակամությունը իրենց հայրերի արյան գնով ազատագրված սուրբ հողը պաշտպանելու և նրան տեր կանգնելու գործում:
Սիրելի ուսանողներ, ուրախ եմ, որ անկախության 25 տարվա ընթացքում մեզ հաջողվել է մեծացնել, կրթել ու դաստիարակել ձեզ նման ազատատենչ, հայրենասեր և շրջահայաց սերունդ:
Միշտ հիշեք, որ հասարակության մեջ պահանջված է լոկ լավ մասնագետը, ուստի հորդորում եմ ձեզ գիտելիքների յուրացման ու մասնագիտական ունակությունների բացահայտման հարցում նախանձախնդիր ու հետևողական լինել:
Ցանկանում եմ, որ խաղաղ երկնքի տակ ամեն վայրկյան զգաք ուսանող լինելու երջանկության բերկրանքը, հետևեք կյանքի ճշմարիտ արժեքներին ու գտնեք ճշմարիտ ուղին: