ԱրՊՀ տնտեսագիտության ֆակուլտետում մասնագիտական օրը նշելը վաղուց ավանդույթ է դարձել: Արդեն երկրորդ տարին է, ինչ ֆինանսահաշվային ամբիոնը ավագ կուրսերի ուսանողների ներգրավմամբ կազմակերպում է բանկային աշխատողի օրվան նվիրված գիտական ընթերցումներ:
Բանկային համակարգը դիտարկելով իբրև տնտեսական կյանքի կենտրոն՝ ընթերցումների մասնակիցները ներկայացրել են բանկերի ծագման պատմությունը, ՀՀ և ԼՂՀ ֆինանսական համակարգը, մետաղադրամների և թղթադրամի շրջանառության պատմությունը, բանկային համակարգին առնչվող համակարգերը` վարկային կազմակերպություններ, արժեթղթերի և արժութային շուկա, բանկ-հաճախորդ հարաբերությունները և այլն:
Բանկային համակարգին առնչվող հետաքրքրական փաստերից բացի, ուսանողները ներկայացրել են նաև իրենց կողմից կազմակերպված սոցիալական հարցման հիման վրա կատարված վերլուծությունների արդյունքները, ըստ այդ եզրակացությունների կատարել և ներկայացրել առաջարկություններ:
Ֆինանսահաշվային ամբիոնի վարիչ Նարինե Մելքումյանը շնորհակալություն է հայտնել մասնակիցներին ուսումնասիրությունների ու հետազոտությունների համար և խորհուրդ տվել ակտիվորեն համագործակցել ամբիոնի հետ: