Բանակ-հասարակություն կապն ամրապնդելու նպատակով մայր բուհի ուսանողներն այցելել են հարավային ուղղությամբ տեղակայված զորամասերից մեկը: Ուսանողները ծանոթացել են զորամասի առօրյային և զինվորներին հանձնել նվերներ` նրանց ուղղված նամակներով:
Նրանք նաև հնարավորություն են ունեցել ճաշելու զինվորների հետ: Ջերմ ու անկեղծ զրույցի ընթացքում զինվորները նշել են, որ գոհ են մատուցվող սննդից` հավելելով, որ նման այցելությունները ոգևորում են նրանց և դրանից էլ ավելի են իրենց գնահատված զգում:
«Անբացատրելի զգացողություն է զինվորների հետ ճաշելը: Թող մեր զինվորների ծնողները վստահ լինեն, որ նրանց տղաներն ամեն օր ապահովվում են օգտակար ու համեղ սննդամթերքով»,-մեզ հետ զրույցում նշել է ուսանողուհի Ռիտա Շիրվանյանը:
Ողջունելով ուսանողների այցելությունը զորամաս` հրամանատարության կողմից շնորհակալության խոսք է ուղղվել ԱրՊՀ-ին` բանակ-հասարակություն կապն ամրապնդելու ուղղությամբ տարվող աշխատանքների համար:
«Շատ կարևոր է, որ երկրի պաշտպանության գործին ներգրավված լինի ողջ ազգաբնակչությունը: Մեր զինվորը թող իմանա, որ նրա թիկունքում կանգնած է ողջ հայ ժողովուրդը»,-իր խոսքում նշել է ԱրՊՀ ՈՒՇՀՀԱ գծով պրոռեկտոր Վ. Յարամիշյանը:
ԱրՊՀ ուսանողները Հադրութի մշակույթի և երիտասարդության կենտրոնում զորամասի զինվորների համար հանդես են եկել համերգային ծրագրով: Հետ չմնալով ուսանողներից` զինվորներն էլ իրենց հերթին են հանդես եկել երաժշտական կատարումներով:
Արցախի պետական համալսարանի կողմից շնորհակալագրեր են հանձնվել ժամկետային զինծառայության մեջ գտնվող ԱրՊՀ ուսանողներին: